www.amude.com - navenda çanda kurdî 16.11.2003 - 02:14 Serokê gelê kurd tune ye! Sîrwan Hecî Berko sirwan@amude.com Abdullah Ocalan (afp) Doh li Başûrê Kurdistanê, partiyeke nû bi navê 'Kongreya Gelê Kurdistan' (KGK) damezirandina xwe eşkere kir. Ev partî kete şûna partiya KADEK, a ku di 26ê meha borî de bû beşek ji dîroka kurd û Kurdistanê. Di daxuyaniya xwe ya ji bo çapemeniyê de, 'Kongreya Gelê Kurdistan' eşkere kir, ku di kongreya damezirandina wê de, endamên wê Zubeyîr Aydar ji xwe re wek serok hilbijartin. Herweha wan serokê PKK û piştre yê KADEK Abdullah Ocalan wek 'serokê gelê kurd' hilbijartin. Dema min ji bo Malpera Amûdê nûçeyek derbarî damezirandina partiya KGK amade dikir û min agahiya li ser hilbijratina Ocalan wekî 'serokê gelê kurd' xwend, min çavên xwe firkandin da ku ez binerim ez baş dibînim an na. Min bawer kir ku şaşitiyeke çapê ye. Lê dema min malpera KADEK vekir û li wê derê jî eynî agahî dît, min dît ku Ocalan bi rastî jî bûye 'serokê gelê kurd'. Wê demê min ji xwe re got: "Ez kurd im, ango endamekî gelê kurd im. Eger Abdullah Ocalan bûye serokê gelê kurd, ew bi vê yekê dibe serokê min jî." Li vê derê ez dipirsim: Kê maf daye partiya KGK û endamên wê ku Ocalan bikin serokê gelê kurd? Ma ew temsîla piraniya kurdan dikin, ku bikaribin biryareke wiha bistînin? Ocalan berê serokek ji serokên kurdan bû, lê di warê fermî de, ew niha ne berpirsê ti partî yan rêxistinê ye. Eger endamên partiya nû wî dîsa ji xwe re serok dibînin, ew dikarin vê yekê bikin. Lê ne ji mafê wan e, ku wî bikin 'serokê gelê kurd'. Gelek serokên kurdan hene, lê ti kes nikare bêyî destûra piraniya kurdan xwe bike serokê gelê kurd. Ez bawer im, hêvî û xewna her kurdekî ye, ku bibe xwedî dewlet û serokekî vê dewletê jî hebe. Lê dewleta me tune ye û ji ber ku dewleta me tune ye, serokê me jî tune ye. Ta niha gelê kurd (mebesta min tevaya gelê kurd e!) ti hilbijartin ji bo serokatiya xwe pêk neaniye. Li Kurdistanê gelek partî hene. Her partiyek xwedî serok an jî sekretêr e. Ger ev partî bihatana û bigotana 'serokê partiya me serokê gelê kurd e', dê gelê kurd ê belengaz di rojekê de bûbûya xwedî 50 serok. Wek ku ez Mesûd Barzanî û Celal Talbanî û serokên hemî partiyên Kurdistanê ji xwe re nabînim serok, ez herweha Ocalan jî ji xwe re wekî serok nabînim. Ew serokên partiyên xwe ne, ne yên gelê kurd in!   veger rûpela destpêkê  copyright © 2000-2002 amude.com [ info@amude.com ]