www.amude.com - navenda çanda kurdî 26.07.2004 - 14:45 Fehed Elî: "Kanalên kurdî pir giran li me xwedî derdikevin." >> Fehed Elî >> Fehed Elî FEHED ELÎ di sala 1975an de li bajarê Hisiça li Suryayê ji dayik bûye. Ew di sala 2000î de koçberî Elmanyayê bû û li bajarê Bremen dimîne. Fehed Elî bi muzîka dîlana kurmancî li şahî û ahengan navek ji xwe re çêkiriye. DORTMUND (amude.com) - Fehed Elî dengbêjeke kurd e ji başûrê-rojavayî Kurdistanê. Ew bêtir bi muzîka dîlana kurmancî di şahî û ahengan de hatiye naskirin. Bi Malpera Amûdê re ew li ser muzîka xwe û ya kurdên Binxetê diaxive û gazinan li kanalên televizyonê yên kurdî dike, ku ew kêm li hunermendên wî perçeyê Kurdistanê xwedî derdikevin. Te kînga dest bi muzîkê kir? - Min di sala 1994an de weke leystikvanê instrumenta kîbordê li gel dengbêjan Azad û Cemalê Tîrêj û Ebilsemed Oso dest bi karê muzîkê kir. Ta niha te çend berhem weşandine? - Min li welat 4 kasêt derxistine. Niha jî em amadekariya xwe bo berhema 5an dikin. Em hêvîdar in, ku emê bikaribin di demeke nêzîk de berhemeke xweş pêşkêş kin. Tu çi şêwe û rengê muzîkê pêşkêş dikî? - Ez muzîka arabêsk çêdikim. Ez bêtir stranên dîlanan li şahî û ahengan dibêjim. Li welat ev karê me bû. Herweha ez beşdarî ahengên Newrozan û yên din jî dibûm. Ez li Elmanyayê jî di heman rewşê de me. Stranên te yên taybetî jî hene? - Erê, stranên min hene. Lê ez bêtir stranên floklorî û yên bav û kalan dibêjim. Tu muzîk û hunera başûrê-rojavayî Kurdistanê çawa dibînî? - Bi rastî gelek hunermendên me yên hêja hene. Hunermendên me yên li welat xwedî derfetine hunerî yên mezin in. Dewlemendiyeke mezin li cem wan peyda dibe. Lê mixabin ji ber tunebûna televizyon û medyayeke xurt, ku xwedê li wan û hunera wan derkeve, ew kêm têne naskirin û bê nav mane. Hunera wan pir pêşketî ye, lê navên wan paşketî ne. Kanalên kurdî pir giran li me xwedî derdikevin. Hevpeyvîn ji aliyê Sîrwanê Hecî Berko ve hate kirin.   veger rûpela destpêkê  copyright © 2000-2004 amude.com [ info@amude.com ]