 |
|||||
 |
|||||
| www.amude.com - navenda çanda kurdî | |||||
|
|||||
 |
|
22.11.2003 - 01:43 Rojnamevanê elman ê navdar Heiner Bremer: "Wêneyê kurdan di medyaya elmanî de gelekî baştir bûye!" Hevpeyvîn: Sîrwan Hecî Berko sirwan@amude.com
AMUDE.COM: Birêz Bremer, tu wêneyê kurdan di çapemeniya elmanî de çawa dinirxînî? Heiner Bremer: Ez bawer im, ku kurdan hiştine ku bi şêweyekî erênî (posîtîv), bi kêmanî gelekî bêalî û tolerant, bêne pêşkêş kirin. Lê rewş di dema xweşewitandinên li ser autobanan (rêyên otomobîlan) wekî din bû. Ew tişt ji bo kurdan ne baş bûn. Lê belê niha rewş hatiye guhertin. Di nerîna min de, raya giştî niha wiha tolerant bi kurdan re dide û distîne, wek ku bi biyaniyên din re dike. Ez behsa wê medyayê dikim, ya ku mecbûra toleransê ye. Wêneyê kurdan di deh salên dawî de gelekî baştir bûye, ji ber çalakiyên li ser autobanan berî demeke dirêj bûn û mirov dibîne, ku kurd xwedî daxwaz in, lê ew doza van daxwazan bi şêweyekî aştyane dikin, ne bi zorê li ser hesabê kesin din, ên ku ti îşê wan bi meseleyê ve tune ne. AMUDE.COM: Sedemin taybet bo vê guhertinê hene? Heiner Bremer: Di baweriya min de, li aliyekî, ev guhertin pêk hatine, ji ber ku kurd daxwaza xwe ya rewa an ne rewa - ez dixwazim vê yekê vekirî bihêlim - ji bo welatekî serbixwe li Tirkiyê nema eşkere li ser xaka elmanî û bi zorê doz dikin. Ev yek piştgiriya prosesa têgihiştinê dike. Li aliyekî din, kurd li Tirkiyê jî rêya siyasî ji xwe re bi kar tînin. Û li aliyê din, wan tirsa bi rola wan a li Bakurê Iraqê ve girêdayî - ew li wê derê hevkarekî konstant ê DYA ne, bêyî ku îşê xwe ji Tirkiyê bînin - bêbingeh kirin. Ev hemî dihêlin, ku - bi kêmanî di vê demê de - bi şêweyekî tolerant û gelekî erênî li kurdan tê nerîn. AMUDE.COM: Tu jî niha bêtir behsa Kurdên li Tirkiyê dikî. Di çapemeniya elmanî de bêtir behsa Kurdên li Tirkiyê tê kirin û Kurdên li devefên din ên Kurdistanê têne piştguh kirin. Sedema vê yekê çi ye? Heiner Bremer: Di nerîna min de, ev sûcê kurdan bi xwe ye, yên ku li Elmanyayê hiştine ku bawerî çêbibe, ku meseleya wan tenê pirsa kurdî li Tirkiyeyê ye. Ji bo xwendevan, temaşevan û guhdarê elman problêma kurdî problêma kurdan li Tirkiyeyê ye. Bandora vê yekê li ser xebata çapemeniyê jî heye û tiştên din winda dibin. Teqez ev yek sûcê xwepêşkêşkirina kurdî ye, ya ku bêtir Tirkiyê xistiye neynikê. AMUDE.COM: Gelo ev yek bi têkiliyên Elmanya bi welatên ku kurd lê dijîn re, girêdayî ye? Heiner Bremer: Ez bawer nakim. Dibe ku ji ber wê ye, ku Tirkiyê ji bo elmanan xwedî girêdaneke din e. Gelek tirk li Elmanya dijîn û kar dikin. Tirkiyê endamekî NATO ye. Ew dixwaze bibe endama Yekîtiya Ewropayê. Ji ber vê yekê, têkiliyên Tirkiyê bi Elmanyayê re ji yên bi Sûryayê û Îranê re xurtir in. Bi van welatên din re têkiliyên bazarvaniyê yên normal hene, lê ew têkiliya taybetî tune ye. Û di baweriya min de, ev yek dihêle ku ragihandina agahiyên ser kurdên li Tirkiyê bi gelekî intensîvtir e. 18.11.2003 |
|
|
|
|
| ||
| ||||
|
 veger rûpela destpêkê |
|
| ||
| copyright © 2000-2002 amude.com [ info@amude.com ] | |||||
|
|||||