 |
|
06.07.2004 - 16:20
Li Duhokê çaremîn kongreya Yekîtiya Nivîskaran
Kurdistanê
Hesen Silêvanî
|
DUHOK (amude.com) - Li jêr duruşma "Ramana azad
demoqrasiyê xurt dike" rêxistina Duhokê ya Yekîtiya
Nivîskarên Kurdistanê (YNK-D) dê pênçema bê
kongreya xwe ya çaremîn li dar xîne. Serokê wê Hesen
Silêvanî ji Malpera Amûdê re eşkere kir,
ku ew dixwaze careke din bo serokatiya YNK-D bête hilbijartin.
Armancên wî ew in, ku "peywendiyên rewşenbîrî
xurtir bike, rewşenbîriya demoqrasiyê
belav bike û bangî rewşenbîrên ji perçeyên din
ên Kurdistanê bo serdana Başûr bike." Dora
150 nivîskar dê beşdarî kongreyê bibin,
a ku dê ji aliyê parêzerê Duhokê
Nêçîrvan Ehmed ve bête birêvebirin.
Di rûniştina pêşî ya kongreyê de,
ya ku dê li hotêla "Jiyan" li dar keve, dê ji bilî xwendina
gotinên bixêrhatinê û nameyên mêvanan
muzîk û stran ji aliyê hunermend Ezedîn Temo
bêne pêşkêşkirin. Di heman demê de,
dê pêşangehek ji weşan û pirtûkên
YNK-D, ku ta niha 55 pirtûk in, bête lidarxistin.
Piştre û di rûniştina duyem de, ya ku dê
tenê bo endaman be, raportên yekîtiyê
yên çandî û aborî dêne bêne xwendin
û guftûgokirin. Herweha dê xebata komîteya birêvebir
a salên borî were guftûgokirin.
Danê êvarê, dê li bexçeyê YNK-D
rûniştina dawî pêk were. Di vê civînê de,
endamên yekîtiyê dê komîteyeke nû ji
7 kesan hilbijêre. Li gorî agahiyên Hesen Silêvanî,
ta niha 18 nivîskaran daxwaza xwe ji bo endametiya komîteya birêvebir
eşkere kiriye.
Silêvanî bi xwe dixwaze careke din bo serokatiya yekîtiyê
bête hilbijartin. Ew dixwaze xebata xwe ya "avakirina
pirên rewşenbîrî di navbera kurdan de"
berdewam bike. Herweha wî diyar kir, ku yek ji armancên wî
yên din ew be, ku YNK-D berdewamiya çapkirina
pirtûkên nivîskarên kurd bike.
Li aliyekî din, serokê YNK-D Silêvanî ji
Malpera Amûdê re diyar kir, ku di meha 10an
de sekretêrê giştî yê PENa Navneteweyî
û cîgira serokê wê xanim Lucina Kathmann
dê serdana başûrê Kurdistanê bikin
û li gel YNK-D li ser peywendiyên rewşenbîrî
guftûgo bikin.
|
|
|
veger rûpela destpêkê