www.amude.com - navenda çanda kurdî 12.07.2004 - 23:26 Rojnameyeke elmanî ya mezin Malpera Amûdê weke çavkanî bi kar tîne >> "taz" >> Nûçeya "taz" bi elmanî >> Apoçî êrîşên li dijî hevalên berê berdewam dikin BOCHUM (amude.com) - Di hejmara wê ya sibe de, rojnameya elmanî "die tageszeitung" (taz) nûçeyek derbarî êrîşa li dijî siyasetvanê kurd Seîdê Heso weşandiye. Rojnameyê Malpera Amûdê weke çavkanî bi kar aniye. Rojnameya taz yek ji mezintirîn û navdartirîn rojnameyên elmanî ye. Malpera Amûdê pêr nûçeyeke berfireh derbarî êrîşa ji aliyê alîgerên Kongra-Gel li dijî Seîdê Heso weşandibû. Ev ne cara pêşî ye, ku Malpera Amûdê ji aliyê dezgeh û medyayên cîhanî ve weke çavkanî tête bikaranîn. Derbarî êrîşa li dijî Seîdê Heso, rojnameya "die tageszeitung" (taz) di hejmara xwe ya 7407an de (13.07.2004) de li ser zimanê berdevkê polîsên bajarê Bochumê nivîsandiye, ku Heso nexwestiye ti agahiyan li ser nasnameya êrîşkeran eşkere bike. Herweha wê nivîsandiye, ku hêzên parztina welat doza Heso biriye cem xwe û dest bi lêkolînan kiriye. Rojnameya "die tageszeitung" (taz) Malpera Amûdê weke çavkanî diyar kiriye. Di nûçeya wê de hatiye nivîsandin: "Li gorî raporteke malpera internêtê ya kurdî amude.com, Heso behsa "hewldaneke kuştinê ya bi mebest" kiriye. Li gorî agahiyên amude, herçar êrîşkerên nediyar fermana kiryara xwe ji PKKê wergirtiye." Rojnameya "die tageszeitung" (taz) radigihîne, ku Seîdê Heso berpirsekî PKK ê Elmanyayê û herweha endamekî "Navenda Eniyê ya Ewropî" bû. Herweha di nûçeya taz de hatiye nivîsandin, ku "Navenda Eniyê çalakiyên PKK ên li Elmanyayê bi rê ve dibir, pasportên sexte amade dikir û kadroyên PKK di rêyên qaçaxê re dianî rojavayê Ewropayê." Rojname berdewam dike û dinivîsîne, ku li gorî agahiyên Parêzeriya Federal, "Heso berpirsê pêşî yê rêxistina Elmanyayê ya PKKê bû." Herweha li gorî wê, Heso di dawiya salên 90î de birêvebiriya giringtirîn herêma PKK li Elmanyayê (bajarên Köln, Bonn, Essen, Duisburg, Düsseldorf û Dortmund) kiriye. Li Elmanyayê, Partiya Karkerên Kurdistanê (PKK) ji sala 1993an ve qedexe ye û ji sala 1996an ve weke "rêxistineke krîmînêl (icramî)" tête dîtin. Rojnameya "die tageszeitung" (taz) yek ji mezintirîn û navdartirîn rojnameyên Elmanyayê ye. Xwedevanên wê bêtir xwedî helwesteke siyasî ya çep in. Îsal 25 sal ser derbasbûna weşandina yekemîn hejmara taz derbas bûn. Malpera Amûdê berî niha weke çavkanî ji aliyê komek ji rojname, kovar, radyo û televizyonên ve hatiye bikaranîn. Herweha Wezareta Elmanyayê ya Karûbarên Hundirîn Malpera Amûdê weke çavkanî bo xebata xwe bi kar tîne. Bi taybetî di dema bûyerên Serhildana Qamişloyê de, Malpera Amûdê bû çavkaniya herî giring bo medyaya cîhanî.   veger rûpela destpêkê  copyright © 2000-2004 amude.com [ info@amude.com ]