 |
|
08.02.2004 - 03:31
Seîd Gabarî: KOMKAR îhaneta min kir!
Seîd Gabarî
|
DORTMUND (amude.com) - Hunermend Seîd Gabarî ragihand Malpera Amûdê,
ku amadekarên xwepêşandana Kölnê nehiştin ku
ew gotina bi navê Yekîtiya Hunermendên başûrê-rojavayî
Kurdistanê pêşkêşî beşdaran ke. Di xwepêşandana
li Kölnê de, mesajên gelek rêxistin û kesayetiyan
hatin xwendin. Gabarî eşkere kir, ku ev yek ji bo yekîtiya hunermendan
û wî bi xwe jî îhaneteke mezin e.
Hunermend Gabarî di telefonekê de bi Malpera Amûdê re
diyar kir, ku KOMKAR û Partiya Sosyalist a Kurdistanê (PSK) li dij
bûn, ku ew gotina yekîtiya hunermendan pêşkêş ke.
Wî berdewam kir û got: "Ji ber ku PSK û KOMKAR
pereyên min xwarine û min doza mafê xwe ji wan kir, ew ji
min aciz bûne û dixwazin min îhanet bikin." Li gorî Gabarî,
PSK û KOMKAR berî çend salan kasêt jê re tomar û
belav kirine, lê ta roja îro jî wî ti pere wernegirtine.
Serokê KOMKAR Fetah Tîmar berî demekê ragihand Malpera Amûdê,
ku ev yek ne rast e.
Seîd Gabarî eşkere kir, ku ew dê dozê li komîteya
Yekîtiya Hunermendên başûrê-rojavayî
Kurdistanê bike, ku êdî nehêle ku endamên wê beşdarî
çalakiyên Hevkariyê bibin. Wî got: "Eger Hevkarî
helwesta xwe li hemberî vê îhanetê diyar neke, ez vê
yekê mîna îhaneta xwe ji aliyê wê ve dihesibînim."
|
|
|
veger rûpela destpêkê