 |
|
02.06.2004 - 20:04
Rêjîma Suryayê doza
rawestandina xebata partiyên kurdî dike
QAMIŞLO (rtr/amude.com) - Do, dezgeha muxaberatan
a "Firaa Filestîn" li Şama paytext
ji çar partiyên kurdî li Suryayê xwest,
ku xebata xwe ya siyasî rawestînin. Herweha wan doz li
partiyên kurdî kir, ku biçin Wezareta Karûbarên Civakî û li wê derê
doza qeydkirinê bikin. Wezareta Karûbarên Civakî
tenê berpirsyarê komeleyan e û ne ya partiyan.
Di rojên bê de, ev doz dê ji
partiyên din jî bête kirin. Endamê
Polîtbîroya Partiya Yekîtî ya Kurd li Suryayê
Fuad Elîko ragihand, ku serokatiya Partiya Baas biryara rawestandina
xebata partiyên kurdî ya partiyetî û siyasî standiye.
Ji ber tunebûna zagonekê bo hebûna partiyan
li Suryayê, partiyên kurdî ne qeydkirî ne.
Rêjîma Suryayê xebata wan a eşkere napejirîne, lê
çavên xwe ji wan re digire. Eger rêjîm partiyan
qedexe bike, ew dê bikevin lîsteya rêxistinên qedexekirî
û îlegal. Li gorî zagonên Suryayê,
endametiya rêxistinên îlegal bi kêmanî
2 sal zindan bi xwe re tîne. Partiyan eşkere kir, ku
ew dê xebata xwe berdewam bikin.
Endamê Partiya Yekîtî ya Kurd li Suryayê Hesen
Salih ragihand Malpera Amûdê, ku partî dê
daxwaza rêjîmê ya rawestandina xebata partiyên kurdî
pêk neynin û xebata xwe ya siyasî berdewam bikin. Hêjayî gotinê ye,
ku rêjîma Suryayê tucarî derfet nedaye
partiyên kurdî ku têkiliyan bi dezgehên wê
yên siyasî re bike; ew tenê dihêle,
ku dezgehên ewlekariyê bi kurdan re bidin û bistînin.
Partiyên kurdî li Suryayê xebata xwe bi şêweyekî
îlegal dikin; zagonên Suryayê hebûna wan
napejirîne. Li Suryayê 13 partiyên kurdî hene.
|
|
|
veger rûpela destpêkê