 |
|
01.03.2004 - 23:48
PENa Kurd Malpera Amûdê rexne dike
BREMEN (amude.com) - Piştî weşandina nûçeya
Malpera Amûdê derbarî hevpeyvîneke
endama komîteya PENa Kurd Hêvî Berwarî, Navenda
PENa Kurd daxuyaniyek ji bo raya giştî belav kir
û tê de dibêje, ku ew rêxistineke kurdî serbixwe ye,
ne partiyeke siyasî ye û ne jî bi ti partiyên siyasî ve girêdayî ye.
Lê ew li ser gotinên xanim Berwarî
derbarî PKK ranaweste.
Di hejmara vê hefteyê ya "Azadiya Welat" de,
endama komîteya PENa Kurd Hêvî Berwarî
di hevpeyvînekê de dibêje, ku berî şoreşa
PKKê gelê kurd mirî bû û
berî PKKê ti şoreşê
bandoreke weke ya PKKê nekir. Berwarî ji aliyê PENa Kurd
ve ji bo beşdarbûna di civîna damezirandina
şaxê bakurê Kurdistanê yê PENa kurd de hatibû şandin
Amedê.
Di daxuyaniya xwe de, ya ku ji Malpera Amûdê re hate
şandin, PENa Kurd radigihîne, ku endamên wê "di her beşekî
jiyanê de xwedî bîr û baweriyên serbixwe ne." Ew berdewam dike û dibêje,
ku ew helwesta xwe ya fermî "tenê di rêya ragihandin û daxuyaniyên Komîteya
Birêvebir a Giştî re dide xuya kirin." Xanim Hêvî Berwarî bi xwe
jî endameke vê komîteyê ye û herweha
berpirsiyara komîsiyona jinan a PENa Kurd e. Di hevpeyvîna xwe de,
wê eşkere nekiribû, ku gotinên wê derbarî
PKK û Abdullah Ocalan nerîna wê ya kesayetî
û ne ya PENa Kurd e.
Serokê PENa Kurd Dr. Zerdeşt Haco ragihand
Malpera Amûdê, ku gotinên endama
PENê Hêvî Berwarî nerîna wê
ya kesayetî ne û ne helwesta PENa Kurd e.
Di dawiya daxuyaniya xwe de, PENa Kurd raya giştî agahdar dike,
ku di rojnameya "Azadiya Welat" de "ne sernavek bi awayê ku di malpera Amûdê
de hatiye weşandin heye", ne jî nîşana Navenda PENa Kurd bê
destura wê hatiye weşandin. Ew bi vê yekê
Malpera Amûdê rexne dike, ku wê sernivîsa
nûçeya xwe ji ber xwe ve derxistiye û herweha
nîşana PENa Kurd bi kar aniye, bêyî ku desturê
jê bixwaze.
|
|
|
veger rûpela destpêkê