www.amude.com - navenda çanda kurdî 28.02.2004 - 02:04 >> Hêvî Berwarî (wêne: Azadiya Welat) >> PENa Kurd >> Hevpeyvîna bi Hêvî Berwarî re (pdf) >> Azadiya Welat >> Malpera PENa Kurd PENa Kurd: "Tevaya gelê kurd berî şoreşa PKKê mirî bû" AMED (amude.com) - Endama Komîteya PENa Kurd Hêvî Berwarî ragihand, ku bi şoreşa PKKê, ya ku berî 30 salan dest pê kir, gelê kurd ji dayik bû. Wê di hevpeyvîneke de bi heftenameya "Azadiya Welat" re got, ku berî PKKê ti şoreşê bandoreke weke ya PKKê nekir. Berwarî di 07ê vê mehê de ji aliyê PENa Kurd ve ji bo beşdarbûna di civîna damezirandina şaxê bakurê Kurdistanê yê PENa kurd de hatibû şandin Amedê. Di komîteya PENa Kurd de, Berwarî berpirsiyara komîsiyona jinan e. Di hejmara "Azadiya Welat" ya ku îroj li Amedê derdikeve û ji doh de di malpera wê ya internêtê de hatiye weşandin de, Hêvî Berwarî pirsa rojanmeyê "Leyla Zana yek ji têkoşerên têkoşîna kurdî ye. Serokê vê têkoşîna ku ev 30 sal e tê meşandin, birêz Abdullah Ocalan jî niha di girtîgehê de di bin tecrîda giran de ye. Ew bi xwe jî rewşenbîr e û gelek girîngiyê dide rewşenbîr û nivîskarên têkoşer, jinên têkoşer. Hûn li ser vê çi dibêjin?" bi vî şêweyî dipersivîne: "Di nav me de pir şoreş hatine kirin, li Başûr jî, li Bakur jî berî vê şoreşê. Li Başûr jî pir hatin kirin. Lê me dît, yekê ji wan jî wekî vê şoreşê bandor nekir. Ez dibêjim, ev şoreşa li Bakur ku di pêşengiya birêz Abdullah Ocalan de dest pê kir, ev nêzîkî sedeyekê bû bandoreke taybet li kurdan kiriye. Berî wê, gelê kurd hemû mirî bû. Hatina wî goristanek giş hişyar kir. Ji mirinê rakirin. Pir şoreş hene, di nav gel de nîn in, ne bi gel re bûn, kesên feqîr, çînên navincî ew tevî şoreşan dibûn. Lê sermayedar, zengîn, axa tevlî wan nedibûn. Lê dema em li vê şoreşa Bakur dinêrin, li ser bingeheke wisa hatiye avakirin, ku hemû çînên civakê li gel xwe digire. Ji olî, ji feodaliyê, ji zengîn û sermayedaran, hemû çîn bi vê şoreşê hişyar bûne, tu sînor nehiştine. Ji aliyekî din ve jî, tiştê ku birêz Ocalan kiriye, ji bo rola jinê, ez dibêjim di cîhanê de tiştekî wisa nehatiye kirin. Wî da fêmkirin ku jin beriya bibe jin, jin mirov e. Wekî zilam xwedî her tiştî ye, xwedî şiyan e, xwedî bîr û bawerî ye, xwedî hest e. Wî bingeheke wisa danî. Nimûneyên me jî ji bo vê pir in, mîna Zîlanê, mîna Bêrîtanê, Bêrîvanê, mîna Zekiye Alkanê, ya ku di Newrozê de agir berda canê xwe. Ev ne tiştekî hindik e. Jin bi hemû warên xwe, bîr û bawerî, kulturî, çandî û fikrî ve hişyar bûye. Ev hişyarkirina ku birêz Ocalan ji bo vî gelî kiriye, tiştekî pir mezin e, ev bi serê xwe şoreşek e. Di pir partiyan de heye, dibêjin jin serbest e, di saziyan de kar dike û hwd. Lê ev tenê bi gotin bûn, di praktîkê de tunebû. Lê niha em dibînin, jin di komîteyan de ne, em dibînin ku civînan bi rê ve dibin, di serokatiyê de ne, em dibînin partiyan bi rê ve dibin. Ji biçûkatiya xwe ve em di nav partiyên kurdî de mezin bûne, lê ev tişt me nedîtine, tenê bi gotin hebûn. Ez dixwazim tiştekî din jî li ser zêde bikim. Birêz Ocalan bi tenê ne bi gotin serok e, li ser jinê pir nirxandin kirine. Me xwendine. Wan nivîsan jî ji bo jinê pir hêzek, baweriyek, quwetek çêkiriye. Parêznameya wî ya dawiyê bi taybetî "Ji şaristaniya Demokratîk…" piştî ku min ew xwend jî, di destpêkê de tesîr li min kir. Çawa ji bingeha jiyanê dest pê kiriye. Di dema neolîtîk de her tiştî bi jinê dest pê kiriye. Jin xwedawend bû, zilam mîna zarokekî girêdayî jinê bû. Mebesta birêz Ocalan di vir de ew e, ku jin careke din li xwe xwedî derkeve, careke din li xwedawendîtiya xwe xwedî derkeve." PENa Kurd di sala 1990î de ji aliyê Huseyin Erdem ve hate damezirandin û ew niha endama PENa Navneteweyî ye.   veger rûpela destpêkê  copyright © 2000-2003 amude.com [ info@amude.com ]