www.amude.com - navenda çanda kurdî 15.06.2004 - 23:52 Partiyên kurdî li Suryayê guh nadin rêjîmê û xebata xwe berdewam dikin QAMIŞLO (amude.com) - Partiyên kurdî li Suryayê li hev civiyan û biryara berdewamiya xebata xwe ya siyasî ya partiyetî da. Partiyan eşkere kir, ku ev yek "mafê tevgera kurdî li Suryayê yê sirûştî û neteweyî ye." Wan diyar kir, ku ew "nûnerên bêtirî 1,5 milyon kurdên li Suryayê" ne û ev yek rewabûnekê dide hebûn û xebata wan. Di destpêka vê mehê de, rêjîma Suryayê ji partiyên kurdî xwest, ku xebata xwe ya siyasî rawestînin û xwe weke komeleyên çandî qeyd bikin. Destûra Suryayê ji bilî Partiya Baas a rêjîmê, hebûna ti partiyên din napejirîne. Di daxuyaniyekê de bi zimanê erebî, ku ji Malpera Amûdê re hate şandin, tevaya partiyên kurdî li Suryayê radigihînin, ku ew li hev civiyane û bi hev re biryar standine, ku xebata xwe ya siyasî ranewestînin û guh nedin daxwazên rêjîmê. Partiyan eşkere kir, ku siyaseteke awarte, ya ku hemî peyman û lihevhatinên navneteweyî binpê dike, li dijî gelê kurd li Suryayê tê bikaranîn. Partî dixwazin "bi xebata xwe siyasî ya aştiyane û bi taybetî di guftûgoyên li gel rêjîmê û hêzên siyasî de çareseriyene rewa" bo doza gelê kurd bi dest xîne. Partiyên kurdî berdewam dikin û dibêjin, ku ji dema damezirandina wan û ta roja îroj, wan "ti têkilî bi ti aliyene biyanî re" pêk neanîne. Ew diyar dikin, ku daxwaza rawestandina xebata wan a siyasî ji aliyê rêjîmê ve, bi gotinên serok Beşar el-Esed re, ku neteweya kurdî beşeke bingehîn e ji dîroka Suryayê, li hev nakin. Herweha partiyan eşkere kir, ku eger rêjîm li ser a xwe bimîne û bixwaze xebata partiyan a siyasî rawestîne, ev yek dê "ziyanê bigihîne yekîtiya neteweyî û eniya hundirîn" û dê bihêle ku "beşek mezin ji gelê surî", yê ku ev partî nûnerîtiya wî dike, ji civakê bête veqetandin. Li Suryayê 14 partiyên kurdî hene. Li gel ku xebata wan qedexe ye, lê ta niha rêjîmê çavên xwe girtine û dihêle ku partî xebata xwe bikin, lê bi şêweyekî dijwar.   veger rûpela destpêkê  copyright © 2000-2003 amude.com [ info@amude.com ]