www.amude.com - navenda çanda kurdî 08.02.2004 - 02:17 Kurdan kiraseke kurdistanî li Kölnê kirin Wêne: 1   2   3   4   5   6   7   8   9   10   11   12   13   14   15   16   17   18   19   20   21   22   23   24   25   26   27   28   29   30   KÖLN (amude.com) - Dora 6000 kurdên ji çend welatên Ewropayê doh li bajarê Kölnê li Elmanyayê gihan hev û piştgiriya xwe ji bo başûrê Kurdistanê û biryarên Perlemana Kurdistanê "federalîzm li ser bingehên siyasî, cografî, netewî û dilxwazî" eşkere kirin. Herweha wan êrîşên li dijî kurdan ên li Hewlêrê şermezar kirin. Ji bilî Kongra-Gel, a ku bi şêweyekî fermî beşdar nebû, bêtirî 17 rêxistinên kurdistanî amade bûn. Ji her çar perçeyên Kurdistanê kurd beşdarî meşê bûn. Tevan bi yekdengî dirûşmên mîna "bijî Kurdistan", "na, na terorîzm" û "federalî ji bo Kurdistan" digotin û bi sedan alayên Kurdistanê û wêneyên şehîdên Hewlêrê bilind kirin. Li gel ku Kongra-Gel bi şêweyekî fermî beşdarî vê çalakiyê nebû, lê komek ji alîger û kadroyên wê tev li kurdistaniyên din bûn. Hevkariya partiyên kurdistanî, ya ku ji dora 17e partiyan pêk tê, beşdarbûneke fermî di xwepêşandanê de ji aliyê Kongra-Gel ve nepejirandibû. Kurdên Başûr li malên xwe man Komek ji polîsên elman ewlekariya xwepêşandanê misoger dikirin. Polîsê berpirsyar ragihand Malpera Amûdê, ku wan 4500 beşdarên xwepêşandanê jimartine. Lê ji ber ku piştre hin kesin din beşdarî çalakiyê bûn, mirov dikare bibêje, ku dora 5000-6000 kurd amade bûn. Hêjayî gotinê ye, ku hejmara kurdên başûr û rojhilatê Kurdistanê gelekî kêm bû. Piraniya beşdaran ji bakur û başûrê-rojavayî Kurdistanê bûn. Li ser vê yekê endamekî Hevkariyê ragihand Malpera Amûdê, ku ew ji vê yekê ne razî ne, çimkî partiyên Başûr soza beşdarbûneke mezin ji aliyê endam û alîgerên wan ve dabûn. Wî berdewam kir û got: "Mixabin ji aiyê Yekîtiya Niştimanî Kurdistan ve ji bilî berpirsyaran kêm kes beşdar bûbûn. Li gel ku YNKê di deqeya dawî de erêkirina xwe ya ji bo beşdarbûna di xwepêşandanê de da, dîsa jî me hêvî dikir, ku ew bikaribin bêtir kesan bînin xwepêşandanê." Ji ber slogana xwepêşandanê "Kerkuk dilê Kurdistan e", YNKê pêşî nedixwest beşdarî xwepêşandanê bibe, çimkî ew peyva Mele Mistefayê Barzanî ye û wê ev yek qet qebûl nedikir. Navê wê jî li ser plakat û rêklaman nehatibû nivîsandin. Lê piştî êrîşa terorîstyane li dijî nivîsgeha wê li Hewlêrê û ya PDKê, YNKê mecbur bû, ku beşdar bibe. Hewlêrê Kerkuk da jibîrkirin Programa çandî ji aliyê hunermendan Şivan Perwer, Fatê, Elî Baran, Evîna Welat û Şêrîn Perwer ve hate pêşkêşkirin. Berî wan gelek axavtin ji aliyê rêxistinên beşdar ve hatin xwendin. Herweha hin mesajên kesayetiyên kurd û ewropî hatin pêşkêşkirin. Yek ji wan mesaja wezîrê Birîtanyayê yê Derve Jack Straw bû. Hunermend Şivan Perwer ji beşdaran re axift û got: "Qîmeta partî û hereketan nemaye. Roj roja hebûn û tunebûnê ye. Roj roja kurd û Kurdistanê ye. Gelê kurd rabûye ser lingan. Xebat ji me re lazim e. Dilê me gelek diêşe. Em gelek xemgîn in." Her kesî behsa yekîtiya kurdan dikir û digot, ku tenê yekîtiya kurdan bersiva terorê ye. Li gel ku slogana xwepêşandanê "Kerkuk dilê Kurdistan e" bû, lê ti kesî û ne bi gotinekê jî Kerkuk neanî ziman. Hewlêrê hişt ku Kerkuk bi kêmanî di vê çalakiyê de were jibîrkirin.   veger rûpela destpêkê  copyright © 2000-2003 amude.com [ info@amude.com ]