www.amude.com - navenda çanda kurdî 26.01.2004 - 14:40 Elmanya xwîna kurdan erzan difroşe Dr. Sadîq Şerefkendî û Ron Arad (wêne: PDKÎ/gamla.org) Kurd di xwaringeha Mykonos de li Berlînê hatin kuştin. (wêne: alefbe.com) >> Nûçeya rojnameya israîlî Haaretz >> Dr. Mihemed Sadiq Şerefkendî kî bû? TEL AVÎV/BERLÎN (dpa/amude.com) - Hikûmeta Elmanyayê amade ye, ku hersê kujerên siyasetvanê kurd Dr. Sadîq Şerefkendî û hevalên wî Fetah Ebdulî, Homayun Erdelan û Nurî Dêhkurdî, yên ku di 17.09.1992an de di xwaringeha 'Mykonos' de li bajarê Berlînê hatin kuştin, serbest berde, weha rojnameya israîlî Haaretz îro ragihand. Kujerên îranî û libnanî dê bibin berdêlî di bazarvaniya guhertina girtiyan de ya di navbera Israîl û Hîzbullahê de. Li gorî agahiyên Haaretz, dê girtiyekî îranî û duduyên libnanî, yên ku di girtîgehên Elmanyayê de ne, serbest bêne berdan, eger Hizbullah balafirvanê israîlî Ron Arad radestî Israîlê bike. Arad ji sala 1986an ve windayî ye. Wê demê balafira wî ket û guman tê kirin, ku Hizbullahê ew radestî Îranê kir û ew li Îranê di zindanê de ye. Li aliyekî din, malbata balafirvanê israîlî Ron Arad piştrast kir, ku eger kurê wan mirî be, ew ne li gel in ku ji bo wî kujer serbest bêne berdan. Hêjayî gotinê ye, ku ji çend salan ve Elmanya di navbera Israîl û Hîzbullah re diçe û tê ji bo mesela girtiyên wan çareser bike. Roleke wê ya mezin di vê bazarganiyê de heye. Ne dûr e, ku Elmanya kujerê Kurdan serbst berde û wan bighîne Hîzbullah. Di 17.09.1992a de, du terorîstên îranî û duduyên libnanî Sekretêrê Giştî yê Partiya Demoqrata Kurdistan - Îran (PDKÎ) Dr. Sadîq Şerefkendî û hevalên wî Fetah Ebdulî (endamê Komîteya Navnedî ya PDKÎ û nûnerê rêxistina partiyê ya Ewropa), Homayun Erdelan (Berpirsê PDKÎ li Elmanya) û Nurî Dêhkurdî di xwaringeha bi navê Mykonos li bajarê Berlînê de kuştin. Yek ji kujerên îranî karîbû bireve Îranê û nehate girtin. Yê din (Kazem Darabî) û herduyên libnanî Mihemed Etrîs û Ebbas Rhayel, ku bi xwe endamên Hîzbullah in, ji aliyê polîsên elman ve hatin girtin. Di 10ê Nîsana 1997an de, dadgeha Berlînê diyar kir ku rêjîma Îranê biryara kuştina siyasetvanên kurd standibû û destûra vê yekê dabû. Dadgehê biryar stand, ku kujerê îranî Darabî û yê libnanî Rhayel ta ku sax bin di zindanê de bimînin. Kujerê libnanî yê din 5 sal zindan stand. Ew niha serbest e. "Şiqamek di rûyê jinebî û sêwiyan de" Ev demek dirêj e, ku Isarîl hewl dide ku kujerên kurdan serbest bêne berdan. Xema wê tenê ew e, ku bi vê yekê agahiyan li ser balafirvanê xwe Ron Arad werbigire. Li ser vê yekê, Hans-Joachim Ehrig, parêzerê jinên kuştiyên kurd, berî demekê ragihand rojnameya elmanî 'Berliner Zeitung', ku ger bi rastî ew kujer serbest bêne berdan, ev dê "bibe şiqamek di rûyê jinebî û sêwiyan de."   veger rûpela destpêkê  copyright © 2000-2003 amude.com [ info@amude.com ]