www.amude.com - navenda çanda kurdî 11.05.2004 - 10:36 Rewşenbîrên kurd doza serbestberdana du nivîskarên kurd dikin STOCKHOLM (amude.com) - Di daxuyaniyekê de, "Inîsyatîva 12ê Adarê" ya rewşenbîrên kurd ji rêjîma Suryayê doza serbestberdana nivîskarê kurd Ebdulselam Darî û helbestvanê kurd Mihemed Bengo (Bavê Tosîn) dike. Herweha ew desthilata Suryayê wek "berpirsa kiryarên nemirovane li dijî gelê kurd" destnîşan dike banga hemî sazî û dezgehên mafê mirovan dike, ku "bi lezgînî dest pê bikin û êrîşên rêjîma Suryayê rawestînin û mafê mirovan biparêzin." Malpera Amûdê daxuyaniya "Inîsyatîva 12ê Adarê" diweşîne: DAXUYANÎ AZADÎ BO NIVÎSKAR EBDULSELAM DARÎ Û HELBESTVAN BAVÊ TOSIN Roj li pey rojê, rêjîma Suryayê hewldanên xwe bo çewisandina gelê kurd li rojavayî Kurdistanê gurtir û dijawartir dike. Di vê çarçeweyê de, bi alîkariya hêzên xwe yên leşkerî û parastinî hetanî aniha bi hezaran kurd hatine girtin û di girtîxaneyan de bi awayên dirinde û hovane têne işkencekirin û riswa û bêrûmetkirin. Di vê daxuyaniyê de, em dixwazin desthilata Suryayê wek berpirsa van kiryarên nemirovane destnîşan bikin û gazî û banga xwe bigihînin hemî sazî û dezgehên mafê mirovan, da ku bi lezgînî dest pê bikin û êrîşên rêjîma Suryayê rawestînin û mafê mirovan di cihênasname û ziman û cihêboçûnan de biparêzin. Her em li vir bi dengekî bilind girtina rewşenbîrên kurd şermezar dikin û piştgiriya xwe bo nivîskarê kurd Ebdulselam Darî û helbestvanê kurd Mihemed Bengo (Bavê Tosin) radigihînin û doza azadî û serbestberdana wan ji rêjîma Suryayê dikin. Di dema ku Inîsiyatîva Rewşenbîrên Kurd piştgiriya xwe bo herdu rewşenbîrên kurd destnîşan dike, ji rêjîma Suryayê daxwaza di cih de berdana wan dike û dengê xwe bi tundî beşdarî wan dengan, ên ku doza mafê demokrasiyê û rêzgirtina mafê mirovan û pêkanîna peyman û mercên navneteweyî yên parastina mafê mirovan dikin, dike. Azadî bo hemî girtiyên bîr û boçûnan û hemî girtiyên siyasî yên di girtîxaneyên Suryayê de! Azadî bo herdu rewşenbîrên kurd Ebdulselam Darî û Mihemedê Bengo (Bavê Tosin)! 10.05.2004 12 Adarê (Insiyatîva Rewşenbîrên Kurd-Surî) http://members.chello.se/helbestvan/12adar.htm   veger rûpela destpêkê  copyright © 2000-2003 amude.com [ info@amude.com ]