www.amude.com - navenda çanda kurdî 29.01.2004 - 00:01 Rojnameya Azadiya Welat êrîşên li dijî rojnamevanên kurd şermezar kir AMED (amude.com) - Rojnameya Azadiya Welat a kurdî ya heftane êrîşên li dijî rojnamevanên kurd û girtina wan şermezar kir. Di daxuyaniyekê de, berpirsê karên nivîsê Hamdullah Yilmaz li ser navê Azadiya Welat destnîşan kir, ku "di pêvajoya ku Tirkiyê bikeve Yekîtiya Ewropayê de", Ajansa Nûçeyan a Dicle û navenda kovarên Ozgur Halk, Genç Bakiş û Îlerîcî Gençlikê ji aliyê polîsan ve "bi awayekî li derveyî pîvan û zagonên çapemeniya gerdûnî rastî serdagirtinê hatin. Yilmaz eşkere kir, ku ew "pêkanînên li derveyî hiqûqê nayên qebûlkirin." Do, li Stenbolê 25 rojnamevanên kurd ji aliyê polîsên tirk ve hatin girtin. Di daxuyaniya xwe de, ku ji Malpera Amûdê re hate şandin, berpirsê karên nivîsê Hamdullah Yilmaz li ser navê Azadiya Welat diyar kir, ku êrîşên li dijî rojnamevanên kurd nîşan didin, ku li "Tirkiyeyê nêzîkbûna saziyên çapemenî û weşanê neguheriye." Wî berdewam kir û got: "Ev jî xuya dike, ku Zagonên Ahengsaziyê yên Yekîtiya Ewropayê li Tirkiyeyê pêk nehatine û ew neketine praktîkê." Derbarî siyaseta Partiya AK, Hamdullah Yilmaz di daxuyaniya xwe de eşkere kir, ku "hikumeta AKPê û derdorên ku tên zanîn, çiqas demokratîkbûne û tahamûla wan a li dijî dîtinên cuda, çiqas pêş ketiye." Wî diyar kir, ku li ber çavan e, ku "divê kes baweriya xwe bi van pêngavên derewîn û îdîayên demokratîkbûnê yên AKPê neynin." Di dawiya daxuyaniyê de, Azadiya Welat êrîş şermezar kirin û doza serbestberdana hempîşeyên xwe yên kir.   veger rûpela destpêkê  copyright © 2000-2003 amude.com [ info@amude.com ]