 |
|
12.07.2004 - 21:03
Ehmed Berwarî: "Nûçeyên li dijî
mam Celal propagandayeke Kongra-Gel e"
>> Ehmed Berwarî
|
BERLÎN (amude.com) - Nûnerê Hikumeta Herêma Kurdistanê
li Elmanyayê Ehmed Berwarî ragihand Malpera Amûdê, ku
nûçeyên ku di medyaya Kongra-Gel de li dijî sekretêrê
giştî yê YNKê Celal Talabanî belav dibin, ne rast in.
Berwarî eşkere kir, ku sedemên vê "propagandaya
li dijî Talabanî" gotinên wî yên li Tirkiyeyê
derbarî Kongra-Gel in. Medyaya Kongra-Gel radigihîne, ku
sê endamên polîtbîroya YNKê daxuyanî
li dijî Talabanî û siyaseta wî belav kirine. Berwarî
piştrast kir, ku tukes bi wan navên ku hatine ragihandin, di
polîtbîroya YNKê de tuneye.
Di medyaya Kongra-Gel de (Ajanseya Dicle ya Nûçeyan,
Ajanseya Mezopotamiya ya Nûçeyan, Rojev.com, azadiyawelat.com,
radyoya Dengê Mezopotamiya), nûçeyeke li ser êrîşên
3 endamên polîtbîroya YNKê li dijî Celal Talabanî
û siyaseta wî hatiye belavkirin. Li gorî vê nûçeyê,
3 endamên polîtbîroya YNKê daxuyanî belav kirine, û
di wan de bi şêweyekî balkêş
Talabanî bi tundî rexne dikin. Herweha tê ragihandin, ku wan
kesan nexwestine navên xwe eşkere bikin, lê bi sertîpên
navên xwe (C.H, M.C û H.M) imze kirine. Daxuyaniyeke wilo do
ji Malpera Amûdê re jî hate şandin. Ev daxuyanî
ji "endam û alîgirên Yekêtiya Niştimanî ya Kurdistan
ên dilsoz û kesên nêzî YNK" re hatiye nivîsandin û ji aliyê
"endamê mekteba siyasî ya YNK C. M. H." ve hatiye imzekirin. Daxuyanî bi
kurmanciya jorîn û tîpên latînî hatiye
nivîsandin. Malpera Amûdê têkilî bi
hin kesên pisporên başûrê Kurdistanê re
kir û agahdarî wergirt, ku tukes bi navê "C. M. H"
di polîtbîroya YNKê de tuneye.
Di nûçeyan û herweha daxuyaniya "C. M. H" de, hatiye
nivîsandin, ku "daxuyaniyên Celal Talabanî yên li Enqereyê derbarê tirkmen,
beesî û kurdan nerazîbûneke mezin di nava YNKê de derxistine holê." Herweha
hatiye nivîsandin, ku "Talabanî ji bo fêda xwe di nav YNKê de grûpan
çêdike, malbata xwe ji bo desthilatdariya
YNKê amade dike û bi gotinên xwe yên nesiyasî û yên ku xizmeta
berjewendiyên hêzên kurd nakin, gelê kurd êşandiye." Li gorî nûçeyan
û daxuyaniya "C. M. H", tukes nikare bi şêweyekî
vekirî rexneyî Talabanî bike, lê ew bangî kurdan dikin,
ku "di malperên kurdan de zexteke mezin liser YNK biden kirin." Li
gorî wan, ev "ne xiyanet e."
Berî çend rojan, Celal Talabanî li Tirkiyeyê bû.
Li wê derê wî got, ku serokê PKKê yê berê
Ebdela Ocalan fermana berdewamkirina şerê çekdarî
li dijî Tirkiyeyê daye. Herweha wî diyar kiribû,
ku alîgerên Ocalan bûne 3ê perçe.
Ev gotin bû sedema acizbûneke mezin di nav Kongra-Gel de.
Serokê Kongra-Gel Zubeyr Aydar Talabanî ji bo gotinên
wî bi tundî rexne kir. Li gorî Aydar, Talabanî
"daxuyaniyên li gorî berjewendiyên dewleta tirk" dide.
Ehmed Berwarî eşkere kir, ku "YNKê guh nade propagandayên
ji aliyê Kongra-Gel ve." Berwarî got: "Li Kurdistanê
komek rojnameyên serbixwe mîna Hawlatî hene.
Ger kesek bixwaze mam Celal rexne bike, ew dikare vê yekê
li wê derê bi navê xwe bike."
|
|
|
veger rûpela destpêkê