www.amude.com - navenda çanda kurdî 27.05.2004 - 13:58 Sîrwanê Hecî Berko dixwaze li dijî Fuad Akpînar dozekê bo "belavkirina derew û gefxwarinan" veke Sîrwanê Hecî Berko & Fuad Akpînar DORTMUND (amude.com) - Di nivîseke xwe ya li jêr navê "Malpera Amûdê li pey çi ye?" de, mirovekî bi navê Fuad Akpînar (Sîpan) êrîşî Malpera Amûdê û berpirsê wê Sîrwanê Hecî Berko dike. Li gorî Akpînar, Sîrwanê Hecî Berko "muxbirçiyê PKKê" ye û ji bo avêtina nûçeyeke derbarî Şivan Perwer ji malperê pere ji hin kesan xwestiye. Akpînar diyar nake bê ev kes kî ne. Herweha Akpînar gefan li Hecî Berko dixwe û wî tehdîd dike, ku "zimanê wî dê bê kinkirin." Sîrwanê Hecî Berko eşkere kir, ku wî di nameyekê de bo Fuad Akpînar derfet daye wî, ku di nivîsekê de "bêbextî û derewên" li dijî wî serast bike û lêborînê bixwaze. Hecî Berko got: "Eger ew vê yekê neke, ez dê li cem polîsên elman dozê li dijî Fuad Akpînar bo gefxwarin û belavkirina derewan li dijî min vekim." Di 25ê vê mehê de, Fuad Akpînar di rêya emailan re nivîsa xwe ya li jêr navê "Malpera Amûdê li pey çi ye?" belav kir. Wî ev nivîs ji gelek kes, dezgeh û malperên kurdî re şandiye. Malpera rizgarî.org ev nivîsa wî îroj belav kiriye. Di wê nivîsa xwe de, Fuad Akpînar dibêje, ku Sîrwanê Hecî Berko ji PKKê re kar dike. Herweha wî nivîsandiye, ku hin kesan telefonî Hecî Berko kirine û jê xwestine ku nûçeya derbarî Şivan Perwer ji Malpera Amûdê bavêje û wî gotiyê "ger hûn bixwezin, dikarin bi peran van gotinan ji malperê derxînin". Herweha Akpînar nivîsandiye, ger "Sîrwan Hecî Berko bi qasî bejn û bala xwe neaxive û zimandirêjiyê bike û berdewam bike û heriyê bavêje heyiyên Kurdistanê, dê zimanê wî bêye kinkirin." Fuad Akpînar kurdekî bakurê Kurdistanê ye. Ew li Elmanyayê dijî û hemwelatiyê vî welatî ye. Nivîsên wî di hin malperên kurdî de têne weşandin. Herweha ew endamê Navenda PENa Kurd e. Sîrwanê Hecî Berko ragihand Malpera Amûdê, ku wî îroj nameyek ji Fuad Akpînar re şand û tê de ji wî xwestiye, ku nivîsekê biweşîne û tê de "hemû bêbextî, derew û gefxwarinên li dijî wî" serast bike û lêborînê jê bixwaze. Hecî Berko got: "Min ji Akpînar xwest, ku ew nivîsekê bi wî şêweyî belav bike, wek ku wî nivîsa li dijî Malpera Amûdê û min belav kiriye. Eger ew vê yekê neke, ez mecbur dibim ku li cem polîsan giliyê Akpînar bikim." Sîrwanê Hecî Berko eşkere kir, ku wî têkilî bi polîsan re çêkiriye û ew li hêviya vekirina dozekê li dijî Akpînar in. Herweha Sîrwanê Hecî Berko malpera rizgarî.org agahdar kiriye, ku bi weşandina wê nivîsê ew dibin hevkarê Fuad Akpînar "di belavkirina derew û bêbextiyan û herweha gefxwarinan de". Wî ragihand, ku eger rizgarî.org wê nivîsê ji malpera xwe navêje û lêborînê nexwaze, ew dê navê wê jî wek hevkarê Akpînar bide polîsan. Li ser vê yekê Sîrwanê Hecî Berko got: "Ez bawer im, malpera rizgarî.org ew nivîsa Akpînarî nexwendiye. Eger berpirsên wê ew xwendibin, teqez wan ew nediwşand. Lê wan weşandiye û min jî ew agahdar kirin û derfet da wan, ku şaşitiya xwe serast bikin. Malperên ku wê nivîsa Akpînar biweşînin, divê bizanibin ku ew bi vê yekê gunehkariyekê dikin."   veger rûpela destpêkê  copyright © 2000-2004 amude.com [ info@amude.com ]