www.amude.com - navenda çanda kurdî 09.08.2003 - 00:29 balyozxaneya serokatiya Yekîtiya Ewropayê pêşwaziya Kurdên Binxetê kir - Xwepêşandana Kurdan bi ser ket Li vê derê bitikîne û li wêneyên xwepêşandanê temaşe bike S.H. Berko - BERLÎN (amude.com) - Îro li paytexta Elmanyayê Berlîn, balyozxaneya Îtalyayê pêşwaziya komîteyeke ji Kurdên Başûrê-Rojavayî Kurdistanê kir û daxwaznameyeke wan bi dest xist. Berî wê bêtirî 600 Kurdên Binxetê xwepêşandaneke aştyane li dar xistin, û bi dirûşm û parolên xwe rêjîma Sûryayê û siyaseta wê li hemberî Kurdan protesto kirin. Di hundirê balyozxaneyê de, Dr. Ibrahîm Mehmûd û Merî Hassan bi amadebûna Malpera Amûdê, ku ji nav medyaya kurdî wê tenê erêkirina derbasbûna balyozxaneyê stand, daxwaznameyek bi zimanê elmanî ji 7 rûpelan dan Sekretêrê Yekem ê balyozxaneyê Alfredo Conte (kurdî: Elfrêdo Kontê), ku tê de rêxistinên Ewropayê yên 8 partiyên kurdî li Sûryayê bi hevkariya HEVAKARÎ û Rêxistina parastina Mafên Mirov li Sûryayê ji Îtalyayê (seroka Yekîtiya Ewropa) doza xebatekê ji bo çareseriya pirsa kurdî li Sûryayê dikin. Dûra, herdu birêzan dora deh deqeyan li gel Conte axiftin û jê re sedemên xwepêşandanê diyar kirin. Herweha wan bi kurtî ji Conte re behsa rewşa Kurdan li Sûryayê û siyaseta rêjîma sûrî li hemberî wan kirin. Ibrahîm û Hassan Conte agahdarî çalakiyên Kurdan ên dawî li Sûryayê kirin û girtiyên van çalakiyan bi nav kirin. Di dawiya axaftina Alfredo Conte li gel nûnerên çalakiya protestoyê de, min ji Conte pirsa nerîna wî li ser vê çalakiya Kurdan û inîsyatîva wan û derfeta pêkanîna armancên wan kir. Bersiva Conte ev bû: "Xwepêşandana îro aştyane bû. Ji aliyê me, em dê gotin û daxwaznameya Kurdan bigihînin Wezareta Jiderve li Romayê û ew dê li ser bixebitin. Em wek balyozxane, tenê dikarin vê yekê bikin." Ev cara yekem bû, ku hikûmeteke ewropî li Kurdên Başûrê-Rojavayî Kurdistanê guhdarî kir û dokumenteke bi daxwazên wan bi dets xist. Ji ber vê yekê, mirov dikare bibêje, ku ev çalakî ta radeyekê bi ser ket. Tevlî nebûna medyaya elmanî, ku vê çalakiyê ragihîne raya elmanî ya giştî, lê dîsa jî gaveke baş bû ji aliyê Kurdan ve. Ji aliyê medyaya kurdî van malper û televizyonan bi pêkanîna hevpeyvînan û kişandina wêneyan roleke balkêş di ragihandina vê çalakiyê de lîstin: Malpera Qamişlo, Malpera Efrîn, Malpera Amûdê, Medya TV (beşê erebî) û KNN TV. Hêjayî gotinê ye, ku ji bilî 2 Kurdên Bakur (yek ji wan birêzek bi navê Mistefa ji partiya PADEK bû), Kurdên beşên din ên Kurdistanê vê carê jî xwedî li çalakiyên Kurdên Başûrê-Rojavayî Kurdistanê derneketin. Min bi beşdarên xwepêşandanê gelek hevpeyvîn kirin. Ew dê sibe di raporeke taybetî de bêne weşandin. >> Li wêneyan temaşe bike   veger rûpela destpêkê  copyright © 2000-2003 amude.com [ info@amude.com ]