www.amude.com - navenda çanda kurdî 05.10.2003 - 12:32 Serokwezîrê Sûryayê pêşwaziya Kurdan kir û soza çareserkirina pirsgirêkên wan da ŞAM (amude.com) - Serokwezîrê Sûryayê Mihemed Nacî El-eterî îro pêşwaziya komîteyeke ji Kurdan kir û soz da wan ku ew ê nêzîk li ser daxwaz û pirsgirêkên wan raweste. Herweha endamekî Perlemana Sûryayê bi navê Ebdulrehman Hemrûş hevdîtin bi Kurdan re pêk anî û soz da wan, ku ew dê bihêle ku di civîna perlemanê ya bê de daxwazên Kurdan bikevin rojeva perlemanê de. Dora 150 Kurdên Binxetê îro li pêşiya avahiya Serokatiya Wezîran li dij projeya 'Serjimartina Awarte' protesto kirin. Ev çalakî bi şêweyeke xweşik û bê ti problêm derbas bû. Sekretêrê Partiya Yekîtî ya Kurdî li Sûryayê Ebdilbaqî Yûsif û yê Partiya Demoqrat a Pêşverû Ezîz Dawê ragihandin MALPERA AMÛDÊ, ku îro ji demjimêr 11-12 (li gorî dema Sûryayê) dora 150 Kurdên Binxetê, ku piraniya wan ji Kurdên 'biyanî' bûn, li pêşiya avahiya Serokatiya Wezîran li dij projeya 'Serjimartina Awarte' protesto kirin. 6 partiyên kurdî li Sûryayê ev çalakî amade kiribûn. Doh, çar partiyên kurdî yên di Hevbendiya Demoqrata Kurd li Sûryayê de, di daxuyaniyekê de beşdarbûna xwe di vê çalakiyê de rawestandin. Piştî hevdîtineke bi berpirsiyarên siyasî û ewlekarî li Parêzgeha Hisiçayê, wan daxuyand, ku berpirsiyaran ji wan xwestiye ku vê çalakiyê li dar ne xînin û soz dane wan, ku ew dê li ser daxwazên wan rawestin. Tenê Partiya Yekîtî ya Demoqrat a Kurd li Sûryayê, ku ew partiya 5an e di Hevbendî de, ev yek ne pejirand û bi partiyên din re beşdarî çalakiya îro bûn. Ebdilbaqî Yûsif û Ezîzê Dawê biryara her çar partiyan rexne kirin. Herduyan nerazîbûna xwe li hemberî wê biryarê diyar kirin û eşkere kirin ku ev tiştekî ne baş bû ji aliyê wan partiyan ve. Herweha wan diyar kir, ku ew partiyên ku xwe ji vê çalakiyê kişandin, şertên pêkanîna çalakiyeke bêdeng û bi hejmareke ne bêtirî 200 kesan û bêyî hildana dirûşman danîbûn û ji aliyê partiyên din ve hatibû pejirandin. Ji ber vê yekê Yûsif û Dawê biryara nebeşdarbûna wan partiyan rexne kirin. Partiyên ku beşdar ne bûn ev in: Partiya Demoqrat a Kurdî li Sûryayê, Partiya Çep a Kurdî li Sûryayê, Partiya Demoqrat a Kurdî li Sûryayê (Elpartî) û Partiya Pêşverû ya Kurdî li Sûryayê.   veger rûpela destpêkê  copyright © 2000-2003 amude.com [ info@amude.com ]