04.02.2003 - 19:30
Li Şamê parêzerên girtiyên kurd rapora xwe
pêşkêşî dadgehê kirin
Hesen Salih
|
ŞAM (amude.com) - Do li paytexta Sûriyê
Şamê rûniştina 3an a dadgehkirina
siyasetmedarên kurd Merwan Osman û Hesen Salih
li pêşiya dadgeha leşkerî
li Şamê pêk hat. Heyşt parêzerên kurd û ereb
amade bûn û di rapora xwe ya ku ji heyşt rûpelan pêk dihat,
bi berfirehî li ser siyaseta ku dijî Kurdan ji dema damezirandina
komara Sûriyê ta niha pêk tê, rawestiyan.
Li gor agahiyên Kurdishmedia.com, projeya "zinara erebî"
(kembera erebî) ya ku sala 1962an li herêma Kurdan li Cezîrê
ji aliyê hikumeta Sûriyê ve hate pêkanîn,
nuqteya herî mezin û giring di rapora parêzeran de bû.
Di vê projeyê de, rêcîma Sûriyê
bi hezaran Ereb ji parêzgehên dî anîn û li dora herêma Kurdan Cizîrê
zinareke erebi çêkirin. Ev siyaset ta roja îro berdewam e. Armanca
sereke ya vê projeyê ew e ku derfet ji Kurdan re nemîne
ku jiyana xwe li cihê bav û kalan berdewam bikin û
bi vê yekê jî nikaribin çand û folkra xwe
biparêzin.
Prêzerên herdu siyasetmedaran berdewam kirin û gotin ku
wan herduan mafê xwe yê xwepêşandana aştiyane
pêk anîn û daxwaza çareserek dadmend
bo pirsa kurdî li Sûriyê kirin. Bêtirî
30 Ereb û Kurd amade bûn ên ku piştgiriya
Hesen Salih û Merwan Osman kirin. Destên van herduyan
di kelepçeyan de bûn.
Dadgehkirina Osman û Salih roja 10.2.2003an berdewam dibe.
Li aliyekî din, ti agahî li ser endamê Yekîtî
yê din Ferhat Ebdilrehman Elî yê ku
roja 28.12.2002an li Libnanê li ser daxwaza Sûriyê
ji aliyê hêzên libnanî ve hatibûn
binçav kirin, tune ne. Malbata wî ya ku li Efrînê dijî,
hatibû Şamê û hewl da ku wî bibînin, lê hemû
derî ji wan re girtîbûn.
- Nûçe bi ingilîzî di kurdishmedia.com de:
http://www.kurdmedia.com/news.asp?id=3397
|
|
