20.01.2003 - 17:15
Dadgehkirina siyasetmedarên kurd li Şamê berdewam dike
Merwan Osman
|
ŞAM (amude.com) - Rûniştina 2an a dadgehkirina
herdu siyasetmedarên kurd Merwan Osman û Hesen Salih
îro li pêşiya dadgeha leşkerî
li Şamê pêk hat.
Li gor agahiyên Kurdishmedia.com, Merwan Osman bi berfirehî
li ser siyaseta Sûriyê ya erebkirinê li Başûrê
Rojavayî Kurdistanê û guhertina navên gund û bajaran
axift. Herwiha wî behsa erdên Kurdan kir ên ku ji wan hatin
stendin da ku têkevin bin destê Ereban ên ku ji aliyê
rêcîma Sûriyê ve hatin anîn herêma Kurdan.
Osman berdewam kir û got ku ev siyaseteke rasîst û
eşkere bû ku ji 40 salan ve ji aliyê recîma Sûriyê
ve dijî Kurdan hate kirin û hîn pêk tê.
Berî van gotinan, Osman û hevalê wî Salih
gotinên xwe di destnivîsekê de dan dadgehê.
Bêtirî 40 Kurdî li dadgehê amade bibûn
li gel grûpek ji avokatên kurd û ereb. Lê dadgehê
derfet neda avokatan ku bi Hesen Salih û Merwan Osman re biaxifin.
Dadgeha leşkerî herdu endamên komîteya navendî ya Partiya Yekîtî ya
Kurd li Sûriyê tawandî endametiya organîsiyonek
qedexe dike.
Dadgehkirina Osman û Salih roja 01.02.2003an
berdewam dibe.
Hêjayî gotinê ye ku Osman û Salih serperestiya xwepêşandana
Kurdan a roja 10.12.2002an li ber dergehê perlemana Sûriyê li Şamê
kiribûn û bi serokê wê re rûniştibûn.
Piştî wê, roja 15-12-2002an, ji bo hevdîtina ku wezîrê navxwe yê Sûriyê xwestibû,
ew çûbûn Şamê û li wir hatin girtin û ta niha di zindana "Edra" de ne.
|
|
