www.amude.com - navenda çanda kurdî 15.11.2003 - 20:31 Partiya Kongreya Gelê Kurdistanê Abdullah Ocalan wekî 'Serokê Gelê Kurd' hilbijart Ala Kongra Gelê Kurdistanê Civîna çapemeniyê ya Konreya Gelê Kurdistan li Başûrê Kurdistanê (MHA) Serokê KGK Zubeyîr Aydar (ruters) DORTMUND (amude.com) - Partiya 'Kongreya Gelê Kurdistanê' (KGK), ku îro li Başûrê Kurdistanê hate îlan kirin, di danezana damezirandina xwe de da xuyanî kirin, ku ew dê mîna partiyeke siyasî ji bo berjewendiyên gelê kurd bixebite. Herweha wê piştrast kir, ku "hilweşandina sînorên dewletên ku kurd di nav de dijîn", ne ji armancên wê ye. Di kongireya xwe ya damezirandinê de, KGK Abdullah Ocalan wekî "Serokê Gelê Kurd" hilbijart. Di civîna çapemeniyê de, ya ku îro li gundekî Başûrê Kurdistanê hate li dar xistin û ji aliyê televizyona erebî El-Cezîre ve bi şêweyekî zindî hate pêşkêş kirin, serokê Kongreya Gelê Kurdistanê' (KGK) Zubeyir Aydar daxuyand, ku "çareseriya pirsgirêka kurd dê li hemû welatên ku kurd lê dijîn, bêyî ku sînor werin guherandin, li ser bingeha yekîtîya azad a demokratîk pêk were." Wî berdewam kir û got: "Armanca Kongra Gelê Kurdistanê ne hilweşandina sînorên dewletên ku kurd di nav de dijîn" e. Banga ji bo diyalogê Konseya Rêvebir a KGK destnîşan kir, ku bûyerên li herêmê û pêvajoya endametiya Tirkiyê di Yekîtiya Ewrûpayê de çareseriyekê ji bo pirsa kurdî ferz dike, lewra "divê organên dewleta tirk dest ji polîtîkayên îmha û înkarê berdin û ji bo çareseriya yekîtiya demokratîk bikevin diyalogê", wiha Konseya Rêvebir a KGK di danezana damezirandina partiya xwe de. Herweha wê bang li Sûriye û Îranê jî kir, ku "bikevin ser rêya demokratîkbûnê û pirsgirêka kurd di vê çarçoweyê de çareser bikin." KGK gef li van welatan xwar û got: "Eger van welatan li ser rêya demokratîkbûnê li çareseriyê negerin, wê têkoşîna azadî û demokratîk a gelê kurd li van welatan zêde bibe." Di cîna çapemeniyê de, Aydar got ku beşê rêxistina nû yê leşkerî dê bimîne. PGK dê riya xweparastinê li pêşiya xwe vekirî bihêle, wiha Aydar. Kongreya Gelê Kurdistanê li ser rewşa Iraqê jî radwestiya û got ku ew "ji bo pêşketina demokrasiya li Rojhilata Navîn Iraqa federal a demokratîk weke gaveke girîng dibîne." Wê bangî partî û rêxistinan kir, ku "li ser nuqteya hevbeş a demokrasiyê" bigihêjin hev û lihevhatinekê bikin. "Kongra Gel wê bi kêra sererastkirinên Emerîka yên li herêmê were. Kongreya Gelê Kurdistanê bang li Emerîkayê jî kir û piştrast kir, ku ew "destwerdana Emerîka ya li rejîma Saddam li cih dibînin, ku vê yekê li Rojhilata Navîn pêvajoyeke nû daye destpêkirin û ji bo ev yek bigihêje qonaxeke erênî, divê pirsgirêka kurd were çareser kirin." Di danezanê de hatiye nivîsandin, ku "damezrandina Kongra Gel wê bi kêra sererastkirinên Emerîka yên li herêmê were." Konseya Rêvebir a Kongra Gel bang li Emerîkayê dike, ku ji bo pirsgirêka kurd divê ew "avabûnên siyasî yên kurd qebûl bike û bi wan re bikeve diyalogê. " Hilbijartina Abdullah Ocalan wekî 'Serokê Gelê Kurd' Di kongreya damezirandina Kongra Gelê Kurdistanê de, Abdullah Ocalan wekî 'Serokê Gelê Kurd', Remzî Kartal, Abdullah Hîcap, Mizgîn Şen, Riza Altun, Rengîn Muhammed û Osman Ocalan jî wekî alîkarên serokê giතtî hatin hilbijartin.   veger rûpela destpêkê  copyright © 2000-2003 amude.com [ info@amude.com ]