www.amude.com - navenda çanda kurdî 25.11.2003 - 00:48 Kurdên Binxetê li Elmanya dê bikevin greveke birçîbûnê DORTMUND (amude.com) - Çend rêxistinên Elmanyayê yên partiyên kurdî li Sûryayê dê di 10.12.2003ê de, roja mafê mirovan a naventewî, li Berlînê dest bi çalakiyên protestoyê li dij rêjîma sûrî bikin. Bêtirî 30 kurd dê 3 rojan li pêşiya perlemana elmanî bikevin greva birçîbûnê. Di şemiya 13ê mehê de, dê li pêşiya avahiya Wezareta Derve xwepêşandanek li dar keve. Di rojên 10,11 û 12ê çileya pêşîn dê greveke birçîbûnê li pêşiya perlemana elmanî li dar keve. Kurdên beşdar dê belavokan belav bikin û tê de ji perlemana elmanî bixwazin, ku zorê bide ser Sûryayê, da ku ew gelê kurd bipejirîne û hemî şêweyên çewisandinê li ser kurdan rake. Herweha ew ê doza serbest berdana girtiyên kurd di zindanên sûrî de bikin. Di roja 13ê mehê de, dê xwepêşandaneke protestoyê li pêşiya avahiya Wezareta Derve ya Elmanyayê pêk were. Li vê derê jî, partiyên kurdî dê di nameyekê de bala wezaretê bikişînin ser rewşa kurdan li Başûrê-Rojavayî Kurdistanê û ji wê doza roleke aktîv di çareserkirina pirsa kurdî li Sûryayê bikin. Li gorî agahiyên ku Malpera Amûdê ji amadekarên çalakiyên protestoyê wergirtin, rêxistinên Elmanyayê yên Partiya Yekîtî ya Kurd li Sûryayê, Partiya Hevgirtina Gelê Kurd li Sûryayê, Partiya Çep a Kurdî li Sûryayê û Partiya Yekîtî ya Demoqrat a Kurd li Sûryayê dê bi hevre bi çalakiyên protestoyê rabin. Nûnerên hin partiyên din ragihandin Malpera Amûdê, ku rêxistinên wan dê beşdar nebin. Li gorî wan, Partiya Yekîtî ya Kurd, ku bi amadekirina van çalakiyan rabûye, ew berî du rojan di civîna partiyan de agahdar kirin, piştî her tişt amade bûbû. Hîn nediyar e, ka kîjan rêxistinên din dê beşdar bibin an na.   veger rûpela destpêkê  copyright © 2000-2003 amude.com [ info@amude.com ]