www.amude.com - navenda çanda kurdî 07.12.2003 - 19:31 Li Hewlêrê Şukur Mistefa hate bi bîr anîn Şukur Mistefa HEWLÊR (amude.com) - Li jêr sîwana serokê Partiya Demokrat a Kurdistan-Iraq Mesûd Barzuanî û bi beşdarbûna wî, Kombenda Kawa bo Çanda Kurdî roja 4ê vê mehê li Hewlêrê ahengeke bibîranîn û rêzgirtinê ji bo rewşenbîrê kurd Şukur Mistefa li dar xist. Hejmareke mezin ji rewşenbîr û siyasetvanên kurd ji seranserî Kurdistanê beşdarî ahengê bûn. Herweha jin û malbata rehmetî jî amade bûn. Di axaftinên xwe de, serokê Kombenda Kawa Selah Bedridîn, cihgirê serokê Komîsyona Zanistî Reşîd Findî, Mehmûd Mihemed bi navê Wezareta Çandê û herweha Aso Hesen bi navê tayê Hewlêrê yê Yekîtiya Nivîskarên Kurdistan li ser rola Şukur Mistefa ji bo pêşxistina çanda kurdî rawestiyan û xebata wî di warê nivîsnadin, wergerê û afirandinê de û herweha di warê pêşxistina prosesa yekgirtina zimanê kurdî de nirxandin. Piştre, nivîskar Mihemed Mele Kerîm lêkolîneke berfireh li ser jiyan û xebat û rola Mistefa di çanda kurdî de û herweha li ser xebata wî ya wergerê û dewlemendkirina pirtûkxaneya kurdî pêşkêş kir. Nivîskar Reşîd Findî jî ji aliyê xwe ve nivîsarek li ser xebata Şukur Mistefa ya wêjeyî û di warê ziman de xwend û herweha li ser rola wî di nûavakirina Komîsyona Zanyarî ya Kurdistanê rawestiya. Xanima dektor Şukriye Resûl jî lêkolînek derbarî raman û çanda rehmetî û herweha nerînên wê li ser jiyana wî ya ramyarî û xebata wî ya afirandinê weke çavkaniyeke giring û ferhengeke mobîl di warê dîrok û çandê de pêşkêşî beşdaran kir. Nivîskar Sero Qadir lêkolîneke rexneyî li ser xebat û helwestên Şukur Mistefa yên ramyarî û felsefî xwend. Qadir çend salan ketibû guftûgoyê li gel Mistefa û nerîna wî ya debarî gelek pirsgirêkên gelek waran dinivîsand û bersivên wî di pirtûkeke de ji 500 rûpelan weşand, ku di destpêka ahengê de hate belav kirin. Di dawiyê de, serokê Yekîtiya Nivîskarên Kurd Dr. Izedîn Mistefa Resûl li ser dîroka Mistefa û jiyana wî ya civakî û çandî û herweha rola wî di pêşxistina çanda kurdî de rawestiya. Hêjayî gotinê ye ku komîteya amadekar ji Selah Bedridîn, berpirsê Kurdistan TV Karwan Akrey û Sero Qadir pêk dihat. Li gorî agahiyên Bedridîn bo Malpera Amûdê, Kombenda Kawa dê nêzîk hemî nivîsar û lêkolînên ku hatin xwendin, di pirtûkekê de biweş,îne. Şukur Mistefa di 18.09.2003ê de li Hewlêrê di 79 saliya xwe de ji ber nexweşiya dilî çû ser dilovaniya xwe.   veger rûpela destpêkê  copyright © 2000-2003 amude.com [ info@amude.com ]