www.amude.com - navenda çanda kurdî 18.10.2003 - 12:41 Li Şamê jî dehsaliya koçkirina Osman Sebrî hate bi bîr anîn Osman Sebrî di sala 1985ê de Rustem Hemze rustem@amude.com ŞAM (amude.com) - Bi helkeftin borîna deh salan li ser koçkirina Apo Osman Sebrî û bi beşdarbûna hejmareke mezin (100 kes) ji siyasetvan, rewşenbîr û xelkên taxa Kurdan li bajarê Şamê, doh êvarî li mala Osman Sebrî li Şamê şevbuhêrkeke bibîranînê hate li dar xistin. Piştî ku birêvebirê şevbuhêrkê Bavê Comerd xêrhatina beşdaran kir, axaftin radestî helbestvana kurd Diya Ciwan kir û wiha wê gotina 'Komîteya Xelata Osman Sebrî' bi devkî got, û tê de ragihand ku Xelata Osman Sebrî ya îsal bo xanim Danielle Mitterrand (Dayka Kurdan) hate layiq dîtin. Pişt re Bavê Şiyar gotina 'Komîteya Şevbuhêrkên Kurdî li Şamê' xwend û wiha got: "Di destpêkê de, ez dixwazim bi navê 'Komîteya Şevbuhêrkên Kurdî li Şamê' gelekî sipasiya hatina we ji bo vejandina bîranîna 10-saliya koçkirina nemirê hêja Osman Sebrî bikim. Wek em tev dizanin, nemir peyakî pir çeleng, jîr û zana bû, û kar û xebata wî di warê çand û konevaniya kurdî de dê bê sûd ne çê. Komîteya me, 'Komîteya Şevbuhêrkên Kurdî li Şamê', ya ku her meh şevekê di warê rewşa kurdî de bi hemû babetên xwe yên hemereng li dar dixe, û ev di sala duyemîn de dibe şeva me ya 3an, lê ji ber taybetiya vê helkeftinê, em bi şan û bi rûmet û bi hevkariya 'Komîteya Xelata Osman Sebrî' û bi alîkariya du kesên bîrwer - mamoste Rustem Hemze û mamoste Şêx Birîmce - me ev şev li dar xist." Piştî vê axaftinê, delîve li ber nivîser, helbestvan û rewşenbîrên kurd vebû, ku vê şevbuhêrkê bi havilên xwe bixemilînin, û kesên ku tevlî vê şevbuhêrkê bûn, ev bûn: - Helbestvan Evdî Çaço çend helbetsên welatparêzî bi çoş û heyecaneke xurt xwendin. - Nivîskar Rustem Hemze gotarek bi sernavê "Pêdeçûnek di berhemên Apo Osman de" xwend, û di vê nivîsara xwe de Hemze li ser her sê berhemên Apo Osman rawestiya, û wiha di destpêka axaftina xwe de got: "Ev demek e, ku ez dixwazim di derheqê Apo Osamn Sebrî de tiştekî binivîsim, lê her ku min ji xwe re digot ez ê dest bi nivîsandinê bikim, tavilê kesaytiya Apo Osman û ked û xebata wî di simaxê min de vedijiyan û hingê sawek ne pendî xwe berdida dilê min, û hew destê min dirêjî pel û pênûsê dibû!" - Helbestvan Can Bapîr û nivîskar Hoşeng Osê li pey hev bi devikî axivîn. Can Bapîr wiha daxwaz kir, ku xebata Apo Osman ne yê ji bîr kirin, û em wî ji xwe re bikin sembola berxwedanê! Hoşeng Osê, û piştî pêdeçûnek kurt di serpêhatiya Osman Sebrî de, bal bi ser xaleke balkêş kişand, ew jî ev e: jidayikbûna Osman Sebrî li bakurê welêt bû, û herwisa xebata wî li wê derê dest pê kir û li başûrê welêt berdewam kir. - Helbestvan Ciwanê Ebdal jî bi xwendina çend helbestan tevlî vê çalakuyê bû. Ew ji Dirbêsiyê hatitbû Şamê, da ku beşdarî vê çalkiyê bibe. - Helbestvan Omer Koçerî helbestek bi zimanê erebî xwend. - Rewşenbîr û nivîskar Selah Berwarî bîranînek li ser Apo Osman anî zimên. - Nivîser û rewşenbîr Dilawer Zengî jî bi devkî axivî û li ser pêdiviya bibîranîna Osman Sebrî di her çax û demî de teqez kir. - Rewşenbî û çîroknivîs Şêx Birîmce (zavê Apo Osman Sebrî) gotina malbatê xwend û wiha got: ”Ez wek zave û nûneê malbata Apo Osman Sebrî, bi navê xwe û kufleta xwe Kewê Osman Sebrî û bi navê malbata Apo Osman hatina we, hemî beşdarên birêz, sipas dikim, û bi taybetî xwediyê daxwaza lidarxistina vê şeva îro, xwediyê kovara 'Xwendevana Nû' mamoste Rustem Hemze, herdu komîteyên bi rûmet 'Komîteya Xelata Osman Sebrî' û 'Komîteya Şevbûhêrkên Kurdî li Şamê', yên ku bi kar û barê vê şevê rabûne, dehsaliya koçkirina mamosteyê gewre mîrê pêdarî û berxwedanê, siyastmeder û ramangîr û helbestvan û perwervanê kurd Apo Osman Sebrî." - Axaftina dawî ji aliyê mamoste, heval û herwisa şagirtê Apo Osman Sebrî Reşîd Şêx El-Şebab ve hate kirin. Di destpêkê de, El-Şebab wiha axivî (bi zimanê erebî): "Xwezî Apo Osman niha li vê derê baya û vê hejmara mezin ji keç û xortên Kurdan bidîtaya, higê dê temenê wî hê jî dirêjtir bibaya". Piştre wî gotineke niviskî xwend û tê de çend serpêhatî û xalên gelek bi rohnî di jiyana Apo Osamn de anîn zimên. Hêjayî gotinê ye, ku El-Şebab pirtûkek bi zimanê erebî li ser bîranînên wî li gel Apo Osman û xebata wî ber hev kiriye. Ji bilî tevlîbûnên beşdaran, gelek birûsk, name û e-mail giheştin vê şevbûhêrkê, ew jî ev in: nivîskar Konê Reş û helbestvan Bêwar Ibrahîm ji Qamişloyê, Dr. Cemal Nebez (endamê Komîteya Xelata Osman Sebrî) ji Elmanya, Sîrwan Hecî Berko (berpirsiyarê Malpera Amûdê) ji Elmaniya, Emîn Derdî, hunermend Ciwan Haco, Partiya Yekîtî ya Demoqrata Kurd li Sûryayê, Komela Ciwanên Kurd li Sûryayê, û herwisa nameyeke sipasiyê ji keç Apo Osaman xanim Hêvî Sebrî ji bo birêvebirên şevbûhêrkê.   veger rûpela destpêkê  copyright © 2000-2003 amude.com [ info@amude.com ]