www.amude.com - navenda çanda kurdî 03.02.2004 - 00:15 Ey Xwedan! QAMIŞLO (amude.com) - Helbestvan û nivîskar Konê Reş ji bo şehîdên Hewlêrê helbestek nivîsandiye û tê de gazinên xwe li Xwedê dike. Ey Xwedan! Ji Samî Ebdilrehman, Sewket Şêx Yezdîn, Seed Ebdela, Ekrem Mentiq, Mehdî Xoşnaw, Xisro Şêra, Şaxwan Ebas û tevên ku bi wan re di roja 01.02.2004an de li Hewlêra paytext şehîd ketin re, dikim diyarî. Ji şehîdên azadiya Kurdistanê re, ji şehîdên cejna qurbana reş re I Ey Xwedan! Heger ola Hz Muhemed rastirîn û dawîtirîn ol be, em gelê kurd ne tenê ji vê olê ne, lê belê me gelek xebat û bizav jê re pêşkêş kiriye Di duyemîn qonax de Selahedîn Eyûbî ev ol ji talanên xaçparêzan parastiye mala pîroz li Qudsê ji destê firenciyan rizgar kiriye û kurd bûn yên ku rêçekên misilmantiya Qadirî û Neqişbendî di Rojhilata Navîn de belav kirine… II Ey Xwedan! Em jî misilman in, neyarên me jî misilman in. Ey Xwedê! Kî dikare mirîd sofî feqî û melayan ji yên kurdan bêtir bibîne? Kî dikare keskên li ber serê gorê miriyan ji yên goristanên Kurdistanê bêtir bibîne? Kî dikare şêx beg û mîrekên ku binijadî xwe dighînin haşimî û qureyşiyan ji yên kurdan bêtir bibîne! Û kî dikare seyidan ji seyidên çiyayên Kurdistanê bêtir bibîne?! III Ey Xwedan! Em jî misilman in û heger neyarên me hebin, ew jî birayên me yên misilman in. Ey Xwedê! Me ji bo misilmantiyê gelek tişt kirin û me ji xwe re tiştek nekir. Ma ji navê te û misilmantiya te re kir, xelkê ji xwe re bir û ji xwe re kir, xelk li ser pişta me û misilmantiya te bilind bûn bûn dewlet ketin xweşiyan de û em û misilmantiya te avêtin… Em ji misilmantiya xwe venegeriyan me dikujin em dibêjin 'em birayên hev ên misilman in' Ey Xwedê! Tu li jor î, xweş dibînî em li jêr in, di rewşek xerab de te bi bîr tînin û kurkê misilmantiyê li xwe digerîn in IV Ey Xwedan! Ew kesên ku bazirganî bi navê te kirin, bi navê misilmantiya te bilind bûn, bûn "sultanê dînê islamê"! Îro neviyên wan bazirganan ne tenê wek wan dikin, ji wan xerabtir dikin, me, kurdên misilman, dikujin serê me jê dikin û şerekî qirêj dijberî me dimeşînin… Da ku em ne bêjin 'em kurd in welatê me Kurdistan e zimanê me kurdî ye' û ji 80ê salî ve gundên me dişewitînin, zarokên me dikin kol e, me sirgûn û mişextî welatê dinyayê dikin û ji dûv pişta me venagerin… Ku em dest li ber xwe hiltînin dibêjin: 'Hûn tirkên çiyayî ne, ne ji mafê we ye hûn bi xak û welat bin hûn dûrî mirovayetî û şaristaniyê ne hûn terorîst in terrorîst!' Gelo rast e em terorîst in? An birayên me yên misilman terorîs tin?! V Ey Xwedan! Her ku em serê xwe bilind dikin û li ber xwe didin, dinya û alem dibêje: 'ev şerê we şerekî qirêj e!" Em jî dizanin ku tev şer qirêj in, lê ku ferece tune be (desthilanîn fereca xêrê ye), em jî li fereca xêrê digerin… û ferece di dest wan de ye, rawestadina vî şerê qirêj di destê wan de ye, kilît di destê wan de ye… tevî ku em herdu cih di misilmantiyê de birayê hev in, lê ew birayetiya me jî naxwazin… VI Ey Xwedan! ji kitikê bizdonektir tune ye dema ku mirov rê lê teng dike, ew kitik dibe wek piling û xwe êrîşî nav çavê neyar dike, da ku xwe azad bike. Em jî li azadiya xwe digerin… VII Ey Xwedan! ji 80ê salî ve em li rêka çûk digerin û ew rêk bi dest me nakeve, wê rêkê nadine me ku em tê re bifirin bi zimanê dê û bavên xwe biaxifin dapîr û bavpîrên xwe nas bikin, şûnewarên pêşîyên xwe bi xepêrin; ji 80ê salî ve çûk û çivîkên welatê me bi ber û berikên tiving û topan têne kuştin, di mişextî û zîvariyan de belav dibin. Roja îro, di taxên derdorî Stenbolê de dor 3ê milyon kurd kom dibin… VIII Ey Xwedan! em jî misilman in em jî dixwazin bi aştî aramî û tenahiyê li ser xaka xwe bijîn. Ey Xwedan! Berzûrî te dibim, hêvî û lavan ji te dikim ku çûk û çivîk bi star di hêlînên xwe de bijîn. Êdî nema kes darên beriwa ji ser çiyayên Kurdistanê bibire… Êdî nema kes berfa sipî li ser çiyayên bi mij û moran sor bike, pezkovî bê tirs ji nêçîrvanan li ser çiyayên Cudî, Barzan, Qendîl, Pîremegrûn û Herekolê Azîzan biçêrin, şivan û gavan bê tirs ji gur û hirçan kerî û garanên xwe di mexelên deşta Sehrezûr, Ormiya û Silîvan de mexelkin… IX Ey Xwedan! Em jî li aştî, aramî û tenahiyê digerin.. Em jî misilman in! Em jî aştîxwaz in! 02.02.2004   veger rûpela destpêkê  copyright © 2000-2003 amude.com [ info@amude.com ]