Chris Kutschera - DORTMUND (amude.com) - "Sînemaya kurdî mîna jineke avis e", ew encam dide, "divê mirov alîkariya wê bike ku bizê... Mirov nikare bihêle ku bimire. Tu nikarî bînî ber çavên xwe bê ez xwe çawa hest dikim. Ji bo deh milyon kesan li Kurdistana Îranê tenê çar an pênc sînema peyda dibin. Û ez dixwazim bi baştirînên cîhanê re li ser heman rêzê bim." >> [Bixwîne]

DORTMUND (amude.com) - Wezîrê Kurdistanê yê berê û sernivîserê rojnameya el-Teaxî Felekedîn Kakayî li Elmanyayê rastî operasyoneke pijîşkî hat. Li gorî agahiyên ku Malpera Amûdê bi dest xistin, opersayona rojnamevan Kakayî bi ser ket. El-Teaxî rojnameyeke rojane ya PDK-Iraq e, ku bi zimanê erebî li Bexdayê derdikeve.

HANNOVER (amude.com) - Helbestvan û endamê polîtbîroya Partiya Yekîtî ya Kurd li Suryayê Merwan Osman bo wergirtina burseya salana ya Hannah Arendt hate hilbijartin. Osman, ku wekî helbestvan "Royarê Amedî" hatiye naskirin, dê bikaribe salekê li Hannoverê bijî. Merwan Osman sêyemîn nivîskar e, ku vê burseyê werdigire. Berî wî nivîskarê ji Rusyaya Sipî Ales Rasanau û helbestvanê ji Kubayê Carlos Valerîno mêvanên Hannoverê bûn. Osman di 15.12.2002an de li Şamê hatibû girtin û di 22ê şibata vê salê de serbest hate berdan. Ev dora du mehan e, ku ew li Ewropayê dimîne. >> [Bixwîne]

KURDISTAN (amude.com) - Çend endamên bilind ên serokatiya Kongra Gel ragihand, ku wan yekcar dev ji Kongra Gel berda û dê li gel kurdên başûrê Kurdistanê û emerêkiyan bixebitin. Grûpa li dor berpirsê PKK ê Ewropayê yê berê Kanî Yilmaz ji KurdishMedia.com re eşkere kir, ku sedema veqetandina wê ji rêxistinê ew e, ku Konga Gel "bo cîhana demoqrat û xebata kesayetî, rewşenbîr û rêxistinên kurdî yên din ne vekirî ye." Kanî Yilmaz diyar kir, ku ew eşkere û bi sîstêm ji medyaya û dezgehên Kongra Gel dihatin bidûrxistin û ev medya "ji aliyê hin kesayetiyên asîmîlekirî tê kontrolkirin û birêvebirin." Berî demekê, Osman Ocalanî jî dev ji rêxistinê berdabû. >> [Bixwîne]

BEYRUT (amude.com) - Serokwezîrê Kurdistanê Nêçîrvan Barzanî dê sibe serdana Suryayê bike. Li gorî rojnameya el-Sefîr ya libnanî, dibe ku Barzanî li ser pirsa hebûn û çalakiyên israîliyan li Kurdistanê li gel rêjîma Suryayê guftûgo bike. Rêjîma surî gumanê dike, ku israîlî piştgiriya kurdan dikin. Lê berpirsên kurd li başûrê Kurdistanê gelek caran eşkere kir, ku nûçeyên derbarî piştgiriya israîliyan bo wan ne rast in. Endamê polîtbîroya PDKê Azad Berwarî dê li gel Barzanî biçe Şamê.

LONDON (amude.com) - Wezîrê Hundir ê Iraqê Felah el-Neqîb diyar kir, ku kurd dikarin xwe ji Iraqê veqetînin, ger ew vê yekê bixwazin. Di hevpeyvînekê de li gel rojnameya erebî el-Şerq el-Ewset de, el-Neqîb got, ku ew dê kurdan mecburî tevlêbûna Iraqê nekin û şerê wan jî nekin. Wî berdewam kir û got: "Çewisandina miletekî ku bixwaze bibe xwedî dewlet, ne mumkin e. Lê sînaryoyeke wilo qet ne di rojevê de ye." El-Neqîb eşkere kir, ku "helwestên kurdan erenî ne."

BONN (amude.com) - Ji sala xwendinê ya bê û pê ve, Zanîngeha Slêmaniyê dê 5% ji ciyên xwendinê bo xwendekarên ji perçeyên din ên Kurdistanê tirxan bike. Wezîra Perwerde, Zanistî, Lêkolîn û Zanîngehên Bilind a hikumeta Herêma Kurdistanê xanim Dr. Şewnem Mihyedîn ragihand Malpera Amûdê, ku hikumeta herêmê biryar standiye, ku xwendekarên ji perçeyên din dê bikaribin bê pere xwendina xwe li Zanîngeha Slêmaniyê bikin. Herweha wê diyar kir, ku xwendevan divê bi kêmanî lîse (bakaloriya) kuta kiribe, da ku bikaribe li zanîngehên Kurdistanê bixwîne.

BONN (amude.com) - Ji serê çileya pêşîn (meha 12an) û pê ve, balafirgehên Slêmaniyê û Hewlêrê dê dest bi pêşwaziya balafiran bikin. Wezîra Perwerde, Zanistî, Lêkolîn û Zanîngehên Bilind a hikumeta Herêma Kurdistanê xanim Dr. Şewnem Mihyedîn ragihand Malpera Amûdê, ku ji wê demê û pê ve, kurdên li derveyî welat dê bikaribin di rêya Stenbolê re bifirin başûrê Kurdistanê. Xanim Şewnem eşkere kir, ku herdu balafirxaneyên Kurdistanê ji aliyê fîrmeyên tirkan ve têne birêvebirin.

Sîrwan Hecî Berko - DORTMUND (amude.com) - Fîlosofê elman Edmund Husserl (1859-1938) carekê di nivîsên xwe de gotineke xweş nivîsandibû: Jiyan helwest e! Nerîna mirovî çawa be jî, divê helwesta wî hertim diyar û eşkere be. Gelek kurd meseleya helwestê gelekî giring nabînin; helwesta xwe li gorî berjewendiyên xwe diguherînin. Hunermend Hikmet Cemîl (Bangîn) yek ji wan kesan e, yên ku helwesta xwe li gorî kêf û berjwendiyên xwe diguherînin. >> [Bixwîne]

FREIBURG (amude.com) - Mesud ciwanekî kurd ê 21 salî ye. Ew ji wan kesan e, yên ku di serhildana kurdên başûrê-rojavayî Kurdistanê de ji aliyê hêzên rêjîma Suryayê ve hatin brîndarkirin. Brîna Mesud gelekî dijwar e. Ew bi fîşekên qedexekirî di lingên wî de hate brîndarkirin. Hin rehên lingên wî têkçûne. Ji ber vê yekê, bavê wî ew aniye Elmanyayê, da ku pisporên elman wî derman bikin. Dibe ku operasyon bi ser nekeve û lingek Mesud bête jêkirin. Ji ber mayîna wî ya li nexweşxaneyê û herweha pereyên operasyonê bi hezaran Euro dikin, rêxistineke olî ya elmanî kontoyek li bankekê jê re vekir. Pêwîstiya Mesudî bi alîkariyê heye. >> [Bixwîne]

Sîrwan Hecî Berko - DORTMUND (Êvar Baş) - kînga ezê bikaribim
25 salên xwe yên sar
bi dîtina te germ bikim?
jiyana xwe ya tarî
bi bejna te ronî bikim?
birînên xwe yên kûr û bê hejmar
bi bêhna te derman bikim?
qêrîna êşa dilê xwe
di hembêza te de bêdeng bikim? >> [Bixwîne]

DORTMUND (amude.com) - Fehed Elî dengbêjeke kurd e ji başûrê-rojavayî Kurdistanê. Ew bêtir bi muzîka dîlana kurmancî di şahî û ahengan de hatiye naskirin. Bi Malpera Amûdê re ew li ser muzîka xwe û ya kurdên Binxetê diaxive û gazinan li kanalên televizyonê yên kurdî dike, ku ew kêm li hunermendên wî perçeyê Kurdistanê xwedî derdikevin. >> [Bixwîne]

DORTMUND (amude.com) - Dengbêjê kurd Hikmet Cemîl (Bangîn) li Kurdistanê eşkere kir, ku ew dê 6 mehên din mala xwe ji Elmanyayê bibe û biçe li Duhokê bijî. "Bangîn" vê şevê di programeke kanala Kurdistan Tv ya taybetî de ragihand, ku ew dê ji bo Kurdistan Tv bixebite. "Bangîn" 3,5 salan weke pêşkêşkerê programên "Şeva Medya" û "Şahiya Roj" di kanalên kurdî Medya Tv û Roj tv de xebitiye. Hin karmendên Roj Tv diyar dikin, ku "Bangîn" ji televizyonê hatiye avêtin, lê "Bangîn" bi xwe eşkere kir, ku wî bi razîbûna xwe dev ji Roj Tv berda. "Bangîn" bo demekê çûye serdana başûrê Kurdistanê dike.

HELEB (amude.com) - Bi beşdarbûna helbestvanên kurd Yasîn Hisên, Rêwî, Kurdyar Dirêj û Meleyê Kurd û helbestvan û romannivîsê ereb Umer Qedur, îna borî li bajarê Helebê li Suryayê şevbuhêrkeke helbestê pêk hat. Beşdaran li ser helbestê bi giştî û ya kurdî bi taybetî û herweha ziman û şêweyên helbestê yên helbestvanên kurd rawestiyan. Ev civîn bi muzîka kamanceya Bavê Dilşad hate destpêkirin.

ŞAM (amude.com) - Dadgeha Ewlekariya Dewletê ya Suryayê îroj dadgehkirina xwendekarê kurd Mesud Hamid ta roja 10.10.2004an bi paş xist. Di heman demê de, wê li ser hemwelatiyên surî Heysem Qetîş çar sal, birayê wî Muhened Qetîş sê sal û rojnamevan Yehya el-Os du sal zindan birî. Li gorî dadgehê, van hersiyan agahî di internêtê de belav kirine, ku "ji bo paraztina berjewendiyên ewlekariya welatî divyabûn" nehatibana belavkirin. Herweha wê ew dibîne, ku wan "nûçeyên ne rast" ji bo berjewendiyên welatine biyanî weşandine. Meha borî, heman dadgehê 2,5 zindan ji bo Ebdilrehman Şaxurî birîn, ji ber wî nûçeyên malperekê di rêya emaila xwe re wergirtibû. Amnesty International û Raportvanên Bê Sînor zindankirina bikarhênerên internêtê rexne û protesto kir.

HANNOVER (amude.com) - Çend helbestvanên kurd li bajarê Hannover li Elmanyayê grûpeke bi navê "Noş - Koma Xwendina Helbesta Kurdî" damezirand. Armanca vê komê ew e, ku du caran di mehê de civînên li ser helbest û helbestvanên kurd pêk bînin. Civîna pêşî dê roja pêncşema 29ê vê mehê pêk were. Helbestvan Tengezarê Marînî dê li ser helbestvan Ehmed Arif biaxive. Civîn dê li ciyê Komîteya Kurdên Hannover, Zur Bettfedernfabrik. 1, li dar keve û ji demjimêr 19:00 ta 21.30 bidomîne.

SLÊMANÎ (amude.com) - Dora 500 rewşenbîr, xwendekar û mamosteyên zanîngehan do li Silêmaniyê ji bo serxwebûna başûrê Kurdistanê xwepêşandanek pêk anî. Xwepêşanderan doza tevlêbûna bajarê Kerkuk bo Herêma Kurdistanê kir. Komîteyek ji wan nameyek bi dozên xwe radestî Yekîtiya Niştimanî ya Kurdistanê (YNK) kir. Yek ji dozên wan ew bû, ku dîktator Sedam Hisên biçe pêşiya dadgeheke neteweyî, ku kurd jî tê de xwedî deng bin. Rewşenbîr û zanyarên kurd bi giranî siyaseta erebkirinê protesto kir û bi dirûşman eşkere kir, ku Kerkuk bajarekî kurdî ye û divê bibe beşek ji Herêma Kurdistanê. Herweha wan bi yekdengî serxwebûn bo başûrê Kurdistanê xwest.

STENBOL (amude.com) - Li Stenbolê, hêjmara 9an a kovara dumehî ya çandî, hunerî û wêjeyî Tîroj derket. Di hejmara Tîrmeh-Tebax 2004an de, doseyek li ser "Mîhrîcan, çanda kurdan û rêvebiriya xwecîhî" hatiye amadekirin. Di doseyê de, bi hevpeyvînên serokê şaredariyên Amed, Dersîm û Bazîdê li ser têkîliyên rêvebiriyên xwecîhî û çanda kurdan tê rawestandin û bandora festîvalan li herêmê tê şirovekirin. Herweha nivîsên Evrîm Alataş, Şeyhmus Dîken, Muhsîn Kizilkaya, Yusuf Karataş, Alî Riza Bîlîr û Vecdî Erbay ciyê xwe di vê doseyê de girtine. >> [Bixwîne]

WEHR (amude.com) - Hikumeta Elmanyayê dixwaze penabera kurd a 19e salî Sultan Şevda û malbata wê vegerîne Tirkiyeyê. Li gel ku ev 145 sal in, ku Sultan li gel dê û bav, sê xuşk û du birayên xwe li Elmanyayê dijî, wan mafê penaberiyê wernegirtiye û niha ji wan tê xwestin, ku ji Elmanyayê derkevin û vegerin Tirkiyeyê. Sultan naxwaze vegere û dibêje, ku ew "li Tirkiyeyê xwe weke miroveke biyanî" hest dike. >> [Bixwîne]

ŞAM/PARÎS (amude.com) - Xwendekarê rojnamevaniyê yê kurd Mesud Hamid (29) dê 25ê vê mehê li Şamê bête dadgehkirin. Ji ber kişandina wêneyên xwepêşandaneke kurdan li Şamê û belavkirina wan di internêtê de, Hamid di 24.07.2003an de ji aliyê hêzên ewlekariyê yê Suryayê ve hate girtin û zindankirin. Rêxistina "Raportvanên Bê Sînor" îroj carake din ji serokê Suryayê Beşar el-Esed doza serbestberdana Mesud Hamid kir. "Amnesty International" jî berî demekê girtina Hamid şermezar kir û dadgehkirina wî "ne dadmend" bi nav kir. Mesud Hamid bitenê di zindana Adra de dimîne û rastî işkenceyine dijwar tê. >> [Bixwîne]

BONN (amude.com) - Komeleya "NAVEND ji bo Lêkolînên Kurdî" dê roja 30ê vê mehê li bajarê Bonnê li Elmanyayê li jêr navê "Pêşketinên rojane li Kurdistana Iraqê" semînarekê li dar xîne. Wezîra Perwerde, Zanistî, Lêkolîn û Zanîngehên Bilind a hikumeta herêma Kurdistanê Dr. Şewnem Mihyedîn dê li gel du şêwerdarên xwe li ser zanîngehên Kurdistanê û rewşa lêkolînên kurdî biaxive. >> [Bixwîne]

Pîr Rustem - EFRÎN (amude.com) - Ji berî çar salan ve û piştî ku serok Beşar el-Esed li şûna bavê xwe rûnişt û desthilatiya Sûriyê bi dest wî hate xistin û wî di hundirê xwendina sûnda xwe de hinek soz ji miletê Sûriyê re berdabûn û ta roja îroj, ev gotin çêrok tête guftûgokirin. Ew carinan sar dibe û hema-hema yek dibêje hate vemirandin, lê tu yê bibînî û nemaze di piş derketina hinek bûyer û pirsgirêkan de, ku ew careke din hate beloqkirin û ev yek bi xwe jî ciyê lêpirsînê ye: Gelo kî vê yekê di dest xwe de dilivîne û çi xwestekên wan jê heye û ka ew çi sûdeyan ji vê konevaniyê dibînin. >> [Bixwîne]

QAMIŞLO (amude.com) - Do li bajarê Lazqiyê, tîpa Cîhad a Qamişloyê bi 4 golan beramber 2 golan zora tîpa ji bajarê Hitîn xist. Mihemedê Beşo, Qezafî û Miwefeq Hisên (2 gol) golên Cîhad derbas kirin. Piştî ku yarî bi dumahî hat, cemawerên Cîhad meşek kêfxweşiyê li nav bajarê Laziqiyê pêk anî. Îna bê, dê Cîhad li dij tîpa Umeye ya bajarê Idlibê bilîze û hevrika wê Ceblê jî dê yariya xwe li gel Mecid a Şamê bike. Piştî ku do Ceblê zora tîpa Yeqezê bir, cudabûna xalan di navbera wê û Cîhad de ma 2 xal.

HEWLÊR (amude.com) - Bi helkefta 15emîn salvegera kuştina sekretêrê giştî yê Partiya Demoqrat a Kurdistanê - Îran Dr. Ebdilrehman Qasimlo, dê îroj li Zanîngeha Selahedîn li Hewlêrê semînareke rêzgirtinê bo xebat û têkoşîna Dr. Qasimlo li dar keve. Lêkolîner Dr. Maruf Xeznedar, siyasetvan Selah Bedridîn, endamê polîtbîroya PDK-Îranê Hesen Şerefî û mamosteyê Zanîngeha Silêmaniyê Dr. Yasîn Serdeştî dê li ser xebat û jiyana Qasimlo biaxivin. >> [Bixwîne]

BEXDAD/DORTMUND (amude.com) - Wezareta Derve ya Iraqê navên komek ji balyozên Iraqê li cîhanê eşkere kir. Navenda Ragihandinê ya Yekîtiya Niştiman a Kurdistanê ragihand, ku Dr. Mihemed Sabir dê bibe balyozê Iraqê li Çînê, Ehmed Bamernî balyozê li Swêd, Adil Murad balyozê li Romanya û Hawar Kaka Ziyad balyozê Iraqê li Kanadayê. Herçar jî endamên bilind ên YNKê ne. Navên balyozên kurd ên din hîn nehatine eşkerekirin. Li Elmanyayê hate ragihandin, ku endamê PDKê Tariq Eqrawî dê bibe balyozê Iraqê li Elmanyayê. Lê ev agahî hîn nehatiye piştrastkirin.

Mişel Temo - QAMIŞLO (amude.com) - Di gotin an gengeşeya mirovan de û bi pêşkirina nerîn û nivîsan, tim mirov dibêje: "Ev nerîna min e", ango "ez" li himber, dijnerîn an jî helwesteke cuda ji yê din re, ango "ew". "Ez" û "Ew" duyemîna peywendiyek jiyanê ne. Ji xwe li ser wê peywendiyê civat ava dibin an jî diherifin. Li ser mijara wekheviya "ez" û "ew", yan nakokiya wan, dixwazim hinekî rawestim. >> [Bixwîne]

DORTMUND (amude.com) - Muzîkvanên kurd Miço Kendeş, Ehmedê Çep û Ebas Bextiyarî dê 26ê vê mehê li Pays d'Uzès li Fransayê konsêrtekê bidin û muzîka kurdî pêşkêş kin. Ev konsêrt dê derbarî 9emîn festîvala "Peravên din" a cîhanî li dar keve. Kendeş û Çep ji başûrê-rojavayê Kurdistanê ne û Bextiyarî ji rojhilatê welêt e. Miço Kendeş stranan dibêje û herduyên din li gel wî muzîkê çêdikin. Konsêrta wan dê li Arpaillargues pêk were û demjimêr 22.00 dest pê bike. >> [Bixwîne]

MÊRDÎN (dîha/amude.com) - Li ser sînorê Suryayê û Tirkiyeyê agir bi erdên bi mayîn ket. Agirê ku li sînorê Tirkiyê yê derket, avêt nav erdên Suryayê yê jî. Li gorî agahiyên ku ji nişteciyên li herêmê hatine standin, cixareyên leşkeran bûye sedema derketina agir. Agirvemirên grêdayî şaredariya Nisêbînê hewl didin, ku agir vemirînin, lê ji ber ku erdê bi mayîn tevde gîhayê hişk e, wan nikaribû agir bixista bin kontrolê.

QAMIŞLO (amude.com) - Li pêş 2000 cemawerên xwe, tîpa Cîhad a ji bajarê Qamişlo do li Şamê di leystika xwe ya li dijî tîpa Wesbê de bi 4 golan bi golekê bi ser ket. Ibrahîm Hecî, Xelefê Elî, Nijmar û Qezafî golên Cîhad anîn. Bi vê serketinê, Cîhad karîbû gaveke din ber bi mayîna di lîga yekemîn de bavêje. Du xal jê re mane, ku bigihê tîpa Ceblê û xwe ji tirsa daketinê rizgar bike. Her yek ji wan herduyan 3 leystikên wê mane. Tîpa ku dawî berî ya din be, ew dê di lîga yekemîn de bimîne û ya din dê dakeve ya nizimtir.

ŞAM (qamislo.com/amude.com) - Ji ber nivîsandina peyva "Qamişlo" li şûna "Qamişlî" wek ku bi erebî tê nivîsandin, dezgeha ewlekariya leşkerî li Şamê mafê rûniştinê û xwendina pijîşkiya zarokan ji 3ê pijîşkên kurd stand û nehişt ku ew xebata xwe berdewam bikin. Pijîşkên kurd Mesûd Ehmed, Esed Şêxê û Kewkeb Mihemed li ser hin rûpelan navê bajarê Qamişlo weha nivîsandibûn, wek ku kurd wî binavdikin, ne wek erebiya wê "Qamişlî". Berî niha jî bêtirî 30 xwendekarên kurd ji zanîngehan hatibûn avêtin, 11e ji wan bi şêweyekî dawî. >> [Bixwîne]

DORTMUND (amude.com) - Komeleya Hêvî ya Çanda Kurdî li bajarê Dortmund li Elmanyayê dê roja 23ê vê mehê şeveke muzîkê li dar xîne. Muzîkvanên kurd Dilovan, Ibrahîm Şêxo, Şêro Betê, Eyhem Elîka û Fayiz Silêman dê beşdarî vê çalakiyê bibin. Ev şev dê li Dortmund, Dietrich-Keuning-Haus, Leopoldstraße 50-58, pêk were û demjimêr 18:30 dest pê bike. Derbasbûn bo herkesî bê pere ye. Komeleya Hêvî nû hatiye damezirandin û armanca wê xebata bo çanda kurdî ye.

DORTMUND (amude.com) - Bi mebesta damezirandina dezgehekê bo rewşenbîrên kurd ên başûrê-rojavayî Kurdistanê, dê di rojên 7-10.10.2004an de li bajarê Sandvîken li Swêdê konferansek li dar keve. "Inîsiyatîva 12ê Adarê ya Rewşenbîrên Kurd (Sûrî)" bangî hemû rewşenbîrên kurd dike, ku beşdarî vê konferansê bibin. Malpera Amûdê daxuyaniya inîsyatîvê diweşîne: >> [Bixwîne]

BOCHUM (amude.com) - Di hejmara wê ya sibe de, rojnameya elmanî "die tageszeitung" (taz) nûçeyek derbarî êrîşa li dijî siyasetvanê kurd Seîdê Heso weşandiye. Rojnameyê Malpera Amûdê weke çavkanî bi kar aniye. Rojnameya taz yek ji mezintirîn û navdartirîn rojnameyên elmanî ye. Malpera Amûdê pêr nûçeyeke berfireh derbarî êrîşa ji aliyê alîgerên Kongra-Gel li dijî Seîdê Heso weşandibû. Ev ne cara pêşî ye, ku Malpera Amûdê ji aliyê dezgeh û medyayên cîhanî ve weke çavkanî tête bikaranîn. >> [Bixwîne]

BERLÎN (amude.com) - Nûnerê Hikumeta Herêma Kurdistanê li Elmanyayê Ehmed Berwarî ragihand Malpera Amûdê, ku nûçeyên ku di medyaya Kongra-Gel de li dijî sekretêrê giştî yê YNKê Celal Talabanî belav dibin, ne rast in. Berwarî eşkere kir, ku sedemên vê "propagandaya li dijî Talabanî" gotinên wî yên li Tirkiyeyê derbarî Kongra-Gel in. Medyaya Kongra-Gel radigihîne, ku sê endamên polîtbîroya YNKê daxuyanî li dijî Talabanî û siyaseta wî belav kirine. Berwarî piştrast kir, ku tukes bi wan navên ku hatine ragihandin, di polîtbîroya YNKê de tuneye. >> [Bixwîne]

Sîrwan Hecî Berko - ESSEN (amude.com) - Seîd Heso kurdekî başûrê Kurdistanê ye. Ji sala 1982an ta dawiya 2002an ew endam û çalakvanekî PKKê bû. Heso demeke dirêj yek ji berpirsên PKK ê bilind li Elmanyayê bû. Wî partî bi rê ve dibir û "kadroyên wê perwede dikir". Ji bo vê xebata wî, polîsên Elmanyayê Heso digire, wî didin dadgehkirin û zindankirin. Seîdê Heso di şibata 2002an ji zindanê derdikeve û dibîne, ku siyaseta PKKê hatiye guhertin û "armancên wê li dijî berjewendiyên gelê kurd in." Ew pişta xwe dide partiyê û xwe jê cuda dike. Çarşema borî, Seîd Heso bû armanca êrîşa 4 kurdan û ji mirinê filitî. Heso piştrast e, ku ew kes alîgerên Kongra-Gel in. >> [Bixwîne]

HANNOVER (amude.com) - Hikumeta Elmanyayê dixwaze sêşema bê penaberê kurd Xalid Xelef vegerîne Suryayê. Ji bo protestokirina vê biryarê, sibe li bajarê Hannover dê xwepêşandanek li dar keve. Xalid Xelef çalakvanekî siyasî ye. Rêjîma Suryayê kesên mîna wî zindan û işkence dike.
Ciyê xwepêşandanê: Hannover, JVA-Langenhagen, Benkendorffstr.32 (Abschiebehaft), Dem: 12.07.04, demjimêr 11.00-12.00, tel: 01725438667, 01627228315

DORTMUND (km/amude.com) - Di sêzdemîn kongreya xwe de, ya ku di rojên 03-08ê vê mehê de pêk hat, Partiya Demoqrat a Kurdistanê - Îran (PDK-Î) doza demoqrsiyê bo tevaya Îranê û federalîzmê bo rojhilatê Kurdistanê kir. Kongreyê doza pêkanîna "sîstemeke demoqratîk a pirhejmar û federal li Îranê û misogerkirina mafên neteweyî yên kurdan li Îranê" kir. Herweha Mistefa Hicrî ji bo sekretariya giştî ya partiyê hate hilbijartin. Hicrî kete şûna Ebdela Hesenzade.

STENBOL (amude.com) - Berî ku siyasetvan û nivîskar Mişel Temo ji serdana xwe ya Ewropayê vegere Kurdistanê, wî rêya xwe bi Tirkiyeyê xist. Li wê derê, rojnameya "Azadiya Welat" hevpeyvînek li gel wî li ser rewşa başûrê-rojavayî Kurdistanê pêk anî. Ev hevpeyvîn îroj di hejmara rojameyê ya teze de derket. >> [Bixwîne] (pdf)

Sebah Etruşî - DUHOK (amude.com) - Do, li Duhokê çaremîn kongreya rêxistina Duhokê ya Yekîtiya Nivîskarên Kurdistanê pêk hat. Hesen Silêvanî, Selam Balayî, Fazil Umer, Mihemed Ebdela, Nacî Berwarî, Arif Hîto, Beşî Mizurî, Muhsin Qocan û Beyar Bavî ji bo komîteya birêvebirina yekîtiyê hatin hilbijartin. Hesen Silêvanî piraniya dengan wergirt û wiha dixuye, ku ew dê careke din bibe serokê yekîtiyê.

DORTMUND (amude.com) - Komeleya "Civata Kurdî" li bajarê Dortmund li Elmanyayê dê roja 17ê vê mehê şeveke muzîkê li gel dengbêjan Fehed Elî, Xelef Şirnexî û Şêrîn li dar xîne. Ev şev dê li Dortmund, Dietrich-Keuning-Haus, Leopoldstraße 50-58, pêk were û demjimêr 16.00 dest pê bike. Bo têkiliyan: 0231.9612581, 0173.5763380.

BEXDAD (rtr/amude.com) - Ji seranserî cîhanê, dora 700 parêzer dixwazin dîktator Sedam Hisên li pêşiya dadgehê biparêzin. Grûpeke islamîstan a nenaskirî bi navê "Seyf Ellah" (Şurê Xwedê) li ser kasêteke vîdyoyê gefê li parêzeran dixwe, ku ew dê qirikên wan biçirînin û serê wan jêbikin, ger ew Sedamî biparêzin. Komek ji parêzerên ereb xwe li Urdunê bo çûna Bexdayê û paraztina Sedamî amade dikin, lê wan ji ber gefxwarina kuştina wan çûna xwe bi paş xist.

STOCKHOLM (afp/amude.com) - Mijailo Mijailovic, kujerê wezîra derve ya Swêdê ya berê Anna Lindh, dê ji bo kiryara xwe nekeve zindanê. Dadgeheke bilind li Stockholmê biryar da, ku Mijailovic divê bikeve pijîşkiya derûnî. Mijailovic di 10.09.2003an de Anna Lindh bi kêrê kuşt. Piştre, dadgehekê ew tawanbarî kuştinê kir û ew ji bo tevaya jiyana wî şand zindanê. Lê pijîşkan lêkolîn kir û piştrast kir, ku Mijailovic nexweşê dirûnî ye. Mijailovic tim digot, ku dengên di hundirê wî de ew mecburî kuştina Lindh kir.

LÜBECK (hl/amude.com) - Li ser daxwaza nivîskarê elman û wergêrê xelata Nobêlê Günter Grass, nivîskar Yaşar Kemal (81) do hate bajarê Lübeck li Elmanyayê û pirtûka bajêr a zêrîn imze kir. Yaşar Kemal di sala 1997an de xelata aştiyê ya bazarganiya pirtûkan a elmanî wergirt. Wê demê, Günter Grass gotineke balkêş li ser Yaşar Kemal û xebata wî pêşkêş kir.

DORTMUND (amude.com) - Hejmareke mezin ji rewşenbîr û siyasetvanên bakurê Kurdistanê gihane hev û dixwazin xebateke hevbeş li dijî projeya serokê PKKê yê berê Ebdela Ocalan a bi navê "Komara Demoqratîk" bixebitin. Li gorî wan, Ocalan û alîgerên wî bi vê konsêptê "dev ji daxwazên kurdan ên neteweyî û siyasî berdane." Herweha ew dibêjin, ku ev konsêpt "bîr û baweriya kemalîzmê ya fermî, ya ku kurdan yekcar qebul nedikir, dipejirîne." Rewşenbîr û siyasetvanên kurd li dijî ji nû ve destpêkirina şer radiwestin û bangî herkesê ku "dijî vî şerî bê armanc in", ku tevlî wan bibe, da ku ew li ser bernameyek hevbeş xebatê bikin. >> [Bixwîne]

Sîrwan Hecî Berko - WUPPERTAL (amude.com) - 113 berhemên hunerî li seranserî qiraxên çemekî xwedî dirêjahiyeke ji 133 kîlomitran. Her kîlomitrek çem berhemeke hunerî hembêz dike. Di 19ê meha borî de, projeya hunerî "Kunstfluss Wupper 2004" (çemê hunerê Wupper 2004) dest pê kir û ta 17ê vê mehê berdewam dike. Bêtirî 30 hunermendên elman ên herêma Bergisch Gladbach li Elmanyayê hunera xwe pêşkêş dikin. Amadekarên vê projeyê dibêjin, ku di cîhanê de projeyeke wilo tuneye. Armanca wan ew e, ku projeya wan bibe "pola ji bo turîzma kulturê". Bi 8 peyker û 7 tabloyan hunermendê kurd Zubêr Yûsiv jî beşdar bûye. >> [Bixwîne]

DORTMUND (amude.com) - Serokê Iraqê Xazî el-Yawer piştrast kir, ku federalîzma başûrê Kurdistanê rastiyeke û di vê yekê de veger tune ye. Di hevpeyvînekê li gel rojanmeya emerîkî "Usa Today" de, el-Yawer nerazîbûna xwe li hemberî biryara Neteweyên Yekbûyî ya derbarî pêşeroja Iraqê eşkere kir. Wî got, ku ew biryar "leystikeke hêzên mezin" bû, lê tikes nikare destê xwe bavêje federalîzma Kurdistanê. Wî piştrast kir, ku ji vê yekê re veger tune ye. El-Yawer got: "Federalîzma Kurdistanê rastiyek e û dê berdewam bibe." Hêjayî gotinê ye, ku dostaniyeke xurt di navbera kurdan û Xazî el-Yawer de heye. Serokê PDKê Mesud Barzanî çend caran ev yek eşkere kir û got, ku kurdan ji wê yekê re xebitîn, ku el-Yawer bibe serokê Iraqê.
>> [Hevpeyvîn bi ingilîzî]

ŞAM (amude.com) - Îna borî, li Taxa Kurdan li Şamê şevbûhêrkeke nû ji Şevbûhêrkên Kurdî li Şamê hate lidarxisitn. Nivîskar û rojnamevanê kurd Rustem Hemze li jêr sernavê "Tîrêjek Ronahî" li ser jiyan û xebata nivîskar û dîroknivîsê kurd Hesen Hişiyar Serdî rawestiya û hin xalên giring di şêwenivîsa Hesen Hişiyar de diyar kirin. Piştre, guftûgoyek li ser vê babetê hate kirin. Hoşeng Osê, Diya Ciwan, Deham Evdilfetah, Mehemed, Şêx Birimce û Selah Berwarî beşdarî vê şevbûhêrkê bûn.

DUHOK (amude.com) - Li jêr duruşma "Ramana azad demoqrasiyê xurt dike" rêxistina Duhokê ya Yekîtiya Nivîskarên Kurdistanê (YNK-D) dê pênçema bê kongreya xwe ya çaremîn li dar xîne. Serokê wê Hesen Silêvanî ji Malpera Amûdê re eşkere kir, ku ew dixwaze careke din bo serokatiya YNK-D bête hilbijartin. Armancên wî ew in, ku "peywendiyên rewşenbîrî xurtir bike, rewşenbîriya demoqrasiyê belav bike û bangî rewşenbîrên ji perçeyên din ên Kurdistanê bo serdana Başûr bike." Dora 150 nivîskar dê beşdarî kongreyê bibin, a ku dê ji aliyê parêzerê Duhokê Nêçîrvan Ehmed ve bête birêvebirin. >> [Bixwîne]

HELEBÇE (ap/amude.com) - Do, dora 3000 kurdên Helebçeyê xwepêşandanek pêk anî û doza dadgehkirina dîktator Sedam Hisên û hevkarê wî Elî Hesen el-Mecîd (Elî Kîmyawî) li Helebçeyê kir. Helebçeyan rahiştibûn wêneyên mirovên xwe, yên ku di 16.03.1988an de piştî êrîşeke ji gazên kîmyawî hatin kuştin. Di wê rojê de, bêtirî 5000 kurd ji aliyê rêjîma dîktator Sedam ve hatin kuştin. Piştre, helebçeyan serdana goristana bajêr kir û doznameyek radestî hin endamên Parlamana Kurdistanê kir. Ew dixwazin ku Sedam û "Elî Kîmyawî" li bajarê wan bêne dadgehkirin û kuştin.

FRANKFURT (amude.com) - Serokê PDKê Mesud Barzanî Elmanyayê tawanbarî pêkanîna siyaseteke li dijî kurdan kir. Wî ragihand rojanmeya "Frankfurter Allgemeine Zeitung" a elmanî, ku ew ji peywendiyên li gel hikumeta elmanî ne razî ne. Barzanî diyar kir, ku hikumeta Elmanyayê ta niha "ne gaveke erenî jî ne ji bo piştgirtiya mafên kurdan, ne jî bo piştgirtiya federalîzmê û ne jî bo piştgirtiya demokratiyê û Iraqa nû avêtiye." Barzanî ji elmanan gazinan dike, ku wan ji bo piştgiriya gelê kurd "hema tiştek nekiriye." Herweha wî eşkere kir, ku eger autonomiya kurdan li başûrê Kurdistanê pêk neyê, Iraq dê ji hev bikeve. Wekî din Barzanî bi tundî li dijî çûna hêzên leşkerî yên welatên cîran bo Iraqê rawestiya.

DORTMUND (amude.com) - Li Elmanyayê, yekemîn CDeya hunermendê kurd Zoro Yûsiv derket. Ev berhema bênav ji 8 stranan pêk tê, ku piraniya gotinên wan ji aliyê Seîd Yûsiv ve hatine nivîsandin. Kurê wî Zoro bi xwe awazên stranên xwe amade kirine. Zoro Yûsiv ji Qamişloyê ye û berî çend salan koçberî Elmanyayê bûye û li wê derê dijî. >> zorosaid_yousef@hotmail.com

Sîrwanê Hecî Berko - DORTMUND (amude.com) - Piştî salekê ji bendewariyeke berdewam, CDeya hunermend Ebas Ehmed "Mêvana Xewnê" derket. Weşanxaneya kurdî Ses Plak li Stenbolê têra xwe bo wê yekê kar kir (an jî nekir), ku ev CD dereng derkeve û pêre bêhna Ebas Ehmed û guhdarên wî biçikîne, tevlî ku ev berhem ji berî salekê (!) ve amade di nav destên wê de bû. "Mêvana Xewnê" ji 10 stranan pêk tê, ku hinek ji wan stranên folklorî ne, lê bi muzîkeke nûjen a kurdî-rojavayî hatine amadekirin. Ev sêyemîn CDeya Ebas Ehmed e, ku ji derveyî welat derketine. >> [Bixwîne]

London (amude.com) - Wezîrê Iraqê yê Derve Hoşiyar Zîbarî piştrast kir, ku rêjîmên Suryayê û Îranê piştgiriya terorîzma li Iraqê dikin. Zîbarî ragihand rojnameya ingilîzî "Sunday Telegraph", ku hikumeta Iraqê belge bi dest xistine, ku destê wan herdu rêjîman di karên terorîstyane li Iraqê de ne. Herweha Zîbarî eşkere kir, ku ew dê di rojên bê de van kiryaran bi belgeyan piştrast bikin. >> [Bixwîne]