STOCKHOLM/BREMEN (amude.com) - Ji bo endamê Polîtbîroya Partiya Yekîtî ya Kurdî li Suryayê Merwan Osman dê li bajarên Stockholm (Swêd) û Bremen (Elmanya) du semînarên siyasî bêne lidarxistin. Osman bo serdanekê hatiye Ewropayê û dê li çend welatan li ser rewşa başûrê-rojavayî Kurdistanê biaxive. >> [Programa semînaran]

ESSEN (amude.com) - Xwendekar û karîkaturîstê kurd Faris Mişel Temo di 24ê vê mehê de serbest hate berdan. Faris kurê rewşenbîr Mişel Temo ye. Temo ragihand Malpera Amûdê, ku kurê wî ji ber karîkaturên wî yên siyasî hatibû girtin. Herweha wî eşkere kir, ku hêzên ewlekariyê ji Faris xwestibûn, ku dev ji karîkaturên siyasî berde û xwe bêtir mijûlî şêweyine din ji karîkaturan bike. Li Suryayê bi sedan ciwan û zarokên kurd hatine zindankirin û rastî işkenceyine dijwar tên. Faris Mişel Temo li zanîngeha Helebê beşê yasa dixwîne. Ew di 17ê gulanê de hatibû girtin.

DORTMUND (amude.com) - Sibe, li bajarê Herne li Elmanyayê dê semînarek ji bo rewşenbîrên kurd Ibrahîm el-Yusiv û Mişel Temo pêk were. Di vê semînarê de, herdu dê li ser rewşa teze ya başûrê-rojavayî Kurdistanê û ya serhildana li wê derê biaxivin. El-Yusiv û Temo îroj hatin Elmanyayê û ji bo wan dê li çend bajarên din semînarine wilo bêne lidarxistin.
HERNE, 31.05.2004, demjimêr: 14:00, Salona Dayin, Werder Str. 53a, Herne (Autobahn 42, Ausfahrt Herne-Horsthausen) tel: 023239596090 (salon), 01719037424, 01748701266 >> [Programa semînaran]

KÖLN (amude.com) - Di yekemîn roja pêşangeha pirtûkên kurdî li bajarê elmanî Kölnê de, komek ji alîgerên KONGRA GEL êrîşî berpirsê malpera "nasname.com" Şukru Gulmuş kir û ew êşand. Serokê KOMKARê Fetah Tîmar ragihand Malpera Amûdê, ku mebesta êrîşkeran "têkbirina pêşangehê bû, lê ew bi ser neketin." Yek ji êrîşkeran ji aliyê polîsan ve hate girtin. Di daxuyaniyekê de, komek ji rewşenbîrên kurd ev êrîş protesto û şermezar kirin. Şukru Gulmuş berpirsekî PKKê yê berê bû û piştî ku berî çend salan dev ji partiyê berda, malpera "nasname.com" vekir û wê weke oposîsyona li dijî Ebdela Ocalan û siyaseta wî bi kar tîne. Li gorî Tîmar, pêşangeha îsal "gelekî biserketî bû û gelek pirtûk hatin firotin." Wî apoçî tawanbar kir û got, ku ew bi êrîşên xwe "daxwaza mîtên tirkan bi cî tînin." Pêşangeha pirtûkan îna borî dest pê kir û îroj bi dawî hat. Ew ji aliyê KOMKARê ve hatibû amadekirin.

DORTMUND (amude.com) - Di nivîseke xwe ya li jêr navê "Malpera Amûdê li pey çi ye?" de, mirovekî bi navê Fuad Akpînar (Sîpan) êrîşî Malpera Amûdê û berpirsê wê Sîrwanê Hecî Berko dike. Li gorî Akpînar, Sîrwanê Hecî Berko "muxbirçiyê PKKê" ye û ji bo avêtina nûçeyeke derbarî Şivan Perwer ji malperê pere ji hin kesan xwestiye. Akpînar diyar nake bê ev kes kî ne. Herweha Akpînar gefan li Hecî Berko dixwe û wî tehdîd dike, ku "zimanê wî dê bê kinkirin." Sîrwanê Hecî Berko eşkere kir, ku wî di nameyekê de bo Fuad Akpînar derfet daye wî, ku di nivîsekê de "bêbextî û derewên" li dijî wî serast bike û lêborînê bixwaze. Hecî Berko got: "Eger ew vê yekê neke, ez dê li cem polîsên elman dozê li dijî Fuad Akpînar bo gefxwarin û belavkirina derewan li dijî min vekim." >> [Bixwîne]

BERLÎN (amude.com) - Di 30ê vê mehê de, li Berlînê dê şeveke muzîkî li gel dengbêjan Mehmud Ezîz û Elî Sofî li dar keve. Ev ahenga ji bo piştgiriya Binxetê dê li Golditzstr. 27, Berlin-Tempelhof, pêk were û demjimêr 16.00 dest pê bike.

DORTMUND (amude.com) - Li çend bajarên Elmanyayê, dê di rojên bê de çend semînar ji bo nivîskar û siyasetvanên kurd Ibrahîm el-Yusiv û Mişel Temo bêne lidarxistin. Di van semînaran de, herdu rewşenbîr dê bi berfirehî li ser rewşa teze ya kurdên başûrê-rojavayî Kurdistanê biaxivin û herweha li ser guhertinên dawî li Suryayê rawestin. Ev semînar ji aliyê kurdên li Elmanyayê ve têne amadekirin. >> [Bixwîne]

PARÎS (amude.com) - Komek ji siyasetvan û rewşenbîrên ereb û kurd ên ji Suryayê û başûrê-rojavayî Kurdistanê dê di rojên 28 û 29ê vê mehê li Parîsê li hev bicivin û li ser guhertinên li Suryayê guftûgo bikin. Komîsyona Ereb a Mafên Mirovan vê konferansê amade dike û di daxuyaniyeke xwe de diyar dike, ku armanca wan ew e, ku "hemû kesên ku bangî guhertinên demoqratîk li Suryayê dikin, bigihên hev û li ser bingehekê li hev bikin, ku piraniya kesên demoqrat û mafnas dipejirînin." Herweha ew dê li ser pêkanîna sendoqeke neteweyî bo alîkariya goriyên siyaseta Suryayê ya binpêkirina mafan biaxivin. Ji başûrê-rojavayî Kurdistanê dê li gel Ibrahîm el-Yusiv, Mişel Temo û Merwan Osman komek ji kurdên li Ewropayê beşdarî vê konferansê bibin. >> [Bixwîne]

MARBURG (amude.com) - Dr. Kemal Sîdo dê îroj êvarî li bajarê Marburg li Elmanyayê di semînarekê de li ser dîrok û rewşa Kurdistanê biaxive. Ev sêminar ji aliyê Komeleya Hevkariya Xiristiyan û Cihûyan ve tê organizekirin. Dr. Kamal Sido di sala 1961ê de li başûrê-rojavayî Kurdistanê ji dayik bûye. Wî xwendina xwe ya akademî li Mosko pêk anî û ji sala 1990î de li bajarê Marburg dijî. Semînar dê li avahiya zanîngehê (salon 110) pêk were û demjimêr 19.30 dest pê bike.

ŞAM (afp/amude.com) - Îroj, dadgehekê li paytexta Suryayê Şam biryara serbestberdana 27 zarokên kurd stand. Ev zarok di 14ê adara borî de hatibûn girtin. Sekretêrê Giştî yê Partiya Pêşverû ya Kurd li Suryayê Ezîz Dawid ragihand, ku dadgehê ji malbatên zarokan xwestiye, ku wan bibin malê. Piştî bûyerên 12ê adarê, li seranserî başûrê-rojavayî Kurdistanê bi sedan zarok û ciwanên kurd ji aliyê hêzên rêjîma Suryayê ve hatin zindankirin û rastî işkenceyên dijwar hatin û tên. Herweha hejmareke mezin ji xwendekarên kurd hatin girtin û hinên din ji zanîngehan hatin avêtin. Li gorî peymanên navneteweyî, nabe ku zarok bêne zindankirin û herweha qedexe ye, ku ew bêne işkencekirin. Rêjîma Suryayê ev peyman imze kirine, lê siyaseta xwe ya binpêkirina mafên mirovan berdewam dike.

BILEFELD (amude.com) - Ji bo pîrozkirina 47 saliya damezirandina Partiya Demoqrat a Pêşverû ya Kurd li Suryayê, rêxistina partiyê ya Elmanyayê dê roja 13.06an li bajarê Bielefeld ahengeke hunerî li dar xîne. Hunermendan Elî Sofî, Dilovan, Siud Ehmed, Zubêr Yûsiv, Ridwan Umer û Koma Cudî dê beşdarî vê şevê bibin. Aheng dê demjimêr 13.00 dest pê bike û li Bielefeld, "Anatolien Zentrum", Herforder Str. 155, pêk were.

DORTMUND (amude.com) - Di van rojên dawî de, dengbêjên kurd Zibêr Salih û Qedrî Zana ji xwe re malperên xwe yên taybetî vekirin. Di van malperan de, mirov dikare dengbêjan bêtir nas bike û herweha li berhemên wan guhdar û temaşe bike. Zibêr Salih ji başûrê-rojavayî Kurdistanê ye û li Elmanyayê dimîne; Qedrrî Zana ji bakurê welêt e û li Swêsrayê dijî.
>> [www.zubersalih.com] [www.qedrizana.com]

MANNHEIM (amude.com) - Di rojên 4û 5ê meha bê de, li bajarê Mannheim li Elmanyayê dê festîvaleke zaroka li dar keve. Fadil Mihemed dê di roja yekê de (demjimêr 18.00) li ser rewşa ciwan û zarokên kurd li Elmanyayê biaxive. Di roja duyem de, dê ji demjimêr 14.00 ta 19.00 çalakiyên hunerî û ferhengî bo zarokan pêk werin. Ev festîval ji aliyê Komeleya Kurdî ya Kulturî û Navenda Kurdî-Elmanî ya Zanyarî û Kulturê li bajarê Mannheim têne amadekirin. Çalakî dê li Stadtjugendring, Neckar Promenade 46, 68167 Mannheim, li dar kevin. Bo têkiliyan: 01624104870 (Geda Îdê).

ŞAM (afp/amude.com) - Dadgeha Ewlekariya Dewletê ya surî îroj careke din dadgehkirina 7 girtiyên kurd bi paş xist. Deh parêzerên kurd û ereb ji bo paraztina wan li dadgehê amade bûn. Dadgehê nehişt ku dîplomatên ji çend welatên Yekîtiya Ewropayê amade bibin. Hemû girtî ji ber beşdarbûna wan di xwepêşandana zarokên kurd de ya di 25.06.2003an de hatin girtin û ji wê rojê de bi şêweyekî xurt têne işkencekirin. Ew têne tawanbarkirin, ku ew endamên grûpine qedexe ne û herweha wan xwestiye "beşekî ji Suryayê bi welatekî biyanî ve girê bidin." Girtiyên kurd dê di 29ê meha bê de careke din biçin pêşiya dadgehê. Malbatên girtiyan tenê her du mehan carekê dikarin serdana wan bikin. Dora 100 çalakvanên kurd û ereb li pêşiya avahiya dadgehê amade bûbûn. Navên girtiyan ev in: Amir Murad, Mihemed Şerîf Ferman, Hozan Ibrahîm, Mihemed Mistefa, Hisên Remedan, Salar Salih Xalid Mihemed Elî.

BERLÎN (amude.com) - Seroka Partiya Keskan a Elmanî Angelîka Beer piştrast kir, ku eger Tirkiyê pirsa kurdî çareser neke, ew dê nekeve Yekîtiya Ewropayê (YE). Beer eşkere kir, ku çendîn ew bi guhertinên dawî yên li Tirkiyeyê kêfxweş be jî, lê ti konsêptên AKP bo çareserkirineke siyasî ji pirsa kurdî re tunene. Beer rexne kir, ku AKP ti program bo pêşxistinên di warên civakî û aborî de li bakurê Kurdistanê amade nekirine. Beer eşkere kir, ku "biryara rêya bo YE ne li Stenbolê, lê li Diyarbekirê tê standin." >> [Bixwîne]

WAŞINGTON (amude.com) - Piştî guftûgoyên di navbera PDKê û YNKê de, Mesûd Barzanî û Celal Talbanî li hev kirin, ku ew yek ji herdu posîsyonên herî bilind di hikumeta Iraqê ya nû de bixwazin. Li gorî rojnameya emerîkî "Washington Post", Celal Talabanî daxwaza herdu partiyan, ku yan serokê Iraqê yan jî serokwezîrê wê yekî kurd be, gihand emerîkiyan. Eger ev yek pêk neyê, kurd dê hikumeta nû boykot bikin, wiha "Washington Post" li ser zimanê kurdan. Nûnerê Yekîtiyên Yekbûyî Lexdar Brahîmî diyar kiribû, ku kurd dikarin posîsyona cîgirê serokdewlet an ê serokwezîr bigirin. Ji mêj ve gotin belav dibin, ku herdu partiyên mezin PDKê û YNKê li hev kirine, ku Mesûd Barzanî bibe serokê Herêma Kurdistanê û Celal Talabanî biçe Bexdayê û posîsyoneke bilind di hikumeta Iraqê de bigire.

DORTMUND (amude.com) - Endamê Komîteya Navendî ya Partiya Sosyalîstz a Holandî yê kurd Serdar Doskî dê îşev bibe mêvanê "Koçka 12ê Adarê" di paltalkê de û li ser hilbijratinên bo Parlamana Ewropayê biaxive. Semînar dê demjimêr 21.00 dest pê bike.

DORTMUND (amude.com) - Wezîrê Suryayê yê Parastinê yê berê Mistefa Tlas eşkere kir, ku rêjîma Suryayê dê nasnameya surî bide 20.000 kurdên bê nasname. Tlas ragihand, ku ew "20.000 kurd bi rastî jî surî ne, lê nehatine qeydkirin." Di hevpeyvînekê li gel rojnameya erebî el-Heyat de, Tlas got, ku li Suryayê kurd mîna ereban in û ti cudahî di navbera ereb û kurdan de tune. Destura Suryayê neteweyeke din ji bilî ya erebî nas nake. Li Suryayê dora 250.000 kurdên bê nasnameya surî hene. Li gorî Tlas, tenê 20.000 ji wan surî ne, yên din "ji Iraq û Tirkiyeyê çûne Suryayê". >> [Bixwîne]

HELEB (amude.com) - Duşema borî, xwendekarê Faris Mişel Temo li bajarê Helebê ji aliyê hêzên ewlekariyê yên surî ve hate girtin. Sedemên girtina wî nediyar in. Faris Temo kurê nivîskar û siyasetvan Mişel Temo ye. Ew xwendekarê Fakulteya Yasa ya Zanîngeha Helebê ye. Komeleya Mafên Mirovan li Suryayê di daxuyaniyekê de doza serbestberdana wî û girtiyên din ên di zindanên Suryayê de dike.

HISIÇA (amude.com) - Li jêr sîwana keşeyê katolîkan li bajarê Hisiça li Suryayê, hunermendê kurd Xidir Ebdilkerîm dê komek ji tabloyên xwe di pêşengehekê de pêşkêş ke. Ev pêşangeh dê ji bo alîkariya zarokên nexweş ên Dêra Mar Asya el-Hekîm di salona keşe Johannes Krom de li dar keve. Pêşangeh dê roja 21ê vê mehê, demjimêr 16.00, dest pê bike. Xidir Ebdilkerîm di sala 1967an de li gundê Kundiro yê bajarê Amûdê ji dayik bûye. Wî gelek pêşangeh pêk anîne û beşdarî komek ji yên din bûye.

BONN (amude.com) - Serokê Partiya Reforman a Surî Ferîd el-Xadirî dê roja yekşema 23 vê mehê li bajarê Bonnê li Elmanyayê beşdarî semînareke "Hevbendiya Demoqrat a Surî" bibe. El-Xadirî dê li ser "siyaset û projeyên emerîkiyan ên vê demê li hemberî Suryayê" biaxive. Herweha dê du kes ji amadekarên semînarê li ser siyaseta "Hevbendiya Demoqrat a Surî" biaxivin. Semînar dê li Universitätsclub, Konviktstr. 9, 53113 Bonn, li dar keve û demjimêr 14.00e dest pê bike. Partiya Reforman a Surî li Emerîkayê hatiye damezirandin û ta vê demê ti bingeha wê li Suryayê diyar nebûye.

UPPSALA (amude.com) - Kurdên başûrê-rojavayî Kurdistanê ên nişteciyên Swêdê dixwazin dezgeheke kurdî ya giştî ji bo xwe damezirînin, ku bikaribe bi navê wan deng bike. Li gorî agahiyên amadekarên vê projeyê, ev dezgeh dê ji kesên girêdayî hêzên siyasî û herweha ji kesên serbixwe pêk were. Civîna damezirandinê dê di 5 û 6ê meha hezîranê de li bajarê Uppsala li dar keve. Ji bo têkiliyê û agahiyên berfireh: kobani@spray.se, tel: 0703403619.

Xalid Xelef

HANNOVER (amude.com) - Xalid Xelef kurdeke 24 salî ji başûrê-rojavayî Kurdistanê ye. Ew di 1999an de koçberî Elmanyayê bû û li wê derê doza mafê penaberiyê kir. Lê daxwaza wî nehate pejirandin. Di tîrmeha 2003an de, ew dîsa vegeriya Suryayê. Lê piştî şeş mehan, Xalid dîsa berê xwe da Ewropayê û li Belcîkayê doza mafê penaberiyê kir. Belcîkiyan pê derxist ku ew berê li Elmanyayê bû. Wan ew di adara borî de radestî elmanan kir. Xalid Xelef niha di zindana Hannover a bo şandina penaberan bo welatên wan de ye. Elman dixwazin wî bişînin Suryayê. Rêjîma Suryayê kurdên mîna Xalid zindan dike û işkenceyine dijwar li dijî wan pêk tîne. >> [Bixwîne]

BEXDAD (dpa/amude.com) - Li Bexdadê, serokê Konseya Demî ya Iraqê Izedîn Selîm di teqîneke tirimbêlê de hate kuştin. Hin endamên din ên konseyê hatin birîndarkirin. Ji bilî Selîm 7 kesên din hatin kuştin. Selîm şîî û serokê partiyeke islamî bû.

BERLÎN (amude.com) - Li Berlînê û ji nav weşanên Unrast, pirtûka nivîskar Helîm Yûsiv "Mêrê Avis" bi elmanî derket. Pirtûk ji aliyê Heidi Karge ve hatiye wergerandin û navê wê yê elmanî "Der Schwangere Mann" e. "Mêrê Avis" yekemîn car di sala 1991ê de bi zimanê erebî derket û wergera wê ya kurdî di 1997an de li Stenbolê derket. Helîm Yûsiv sala 1967an li Amûdê ji dayik bûye. Ew ji sala 2000î ve li Elmanyayê dijî û di kanala televizyonê ya kurdî "Roj tv" de dixebite.
>> [www.unrast-verlag.de/unrast,2,138,3.html]

ZÜRICH (amude.com) - Yekemîn çampyona gokê ya cîhanî li Efrîqayê dê di sala 2010an de li Başûrê Efrîqayê li dar keve. Ji bilî Başûrê Efrîqa, Misir, Mexrib û Lîbya dixwestin ku çampyona gokê li cem wan li dar keve. Lê piraniya endamên FÎFA dengê xwe dan Başûrê Efrîqayê.

STOCKHOLM (amude.com) - Îroj û sibe, Federasyona Komeleyên Kurdistanê li Swêdê (FKKS) dê kongreya xwe 21ê li dar xîne. Îroj dê bêtir axaftin û raportên xebatê bêne pêşkêşkirin. Sibe, organên FKKSê dê bêne hilbijartin. Federasyona Komeleyên Kurdistanê li Swêdê di 22ê Gulana 1981ê de hat damezirandin. Ew ji komele û yekîtiyên kurd li Swêdê pêk tê. Federasyon roleke bingehîn û giring di jiyana kurdên Swêdê ya siyasî û civakî de dilîze. Kongreya FKKSê dê li Stockholmê, ABF Huset, Z Salen, Sveavägen 41, li dar keve.
>> [www.kurdiskarf.org]

TEHRAN (afp/amude.com) - Do li pêşiya balyozxaneya Elmanyayê li paytexta Îranê Tehran, tabloyeke bibîranînê li dijî firotina çekên kîmyayî ji aliyê elmanan ve bo Iraqê di dema şerê di navbera Iraq û Îranê de di salên 80ê de hate sazkirin. Ev tablo weke reaksyoneke îraniyan li dijî tabloya bibîranînê hat, a ku di 20.04.2004an de li Berlînê ji bo bibîranînên şehîdên kurd ên PDK-Î hate sazkirin. Li ser wê tabloyê bi elmanî hatiye nivîsandin, ku Dr. Sedîq Şerefkendî û hevalên wî yên din di 17.09.1992an de li xwaringeha Mykonos li Berlînê ji aliyê desthilatdarên Îranê yên wê demê ve hatin kuştin. Ev tablo bû sedema konflîktekê di navbera Îran û Elmanyayê de.

>> [Li Berlînê dê perdeya li ser tabloyeke bibîranîna şehîdên kurd bête rakirin]

DORTMUND (amude.com) - Di hevdîtina xwe ya dawî li gel parêzerên xwe de, serokê PKKê yê berê Ebdillah Ocalan gazin kir, ku ti kes wî ji bo wergirtina xelata Nobelê pêşniyaz nake. Li gorî nûçeyeke radyoya "Dengê Mezopotamya", Ocalan di hevdîtinê de eşkere kir, ku hin kes "dixwazin wî bikujin û piştre Leyla Zana bikin seroka kurdan." Ocalan diyar nekir, bê kî dixwaze vê yekê bike. Ocalan got: "Li holê leystikên mezin hene. Leyla Zana keseke durust e. Dixwazin wê li gorî daxwazên xwe bi kar bînin. Dixwazin Xelata Nobelê bidin Leyla Zana. Bi salan e ez hewldanên aştiyê dimeşînim. Ji bo min tiştek nabêjin. Dixwazin berê min bikujin, dû re Leyla bikin seroka kurdan."

STOCKHOLM (amude.com) - Di roja koçkirina siyasetvan û parêzerê kurd Edîb Karahan de, nivîskarên kurd Mistefa û Ibrahîm Seydo Aydogan di peyamekê de wî bi bîr tînin. Malpera Amûdê peyama herdu nivîskaran diweşîne:

Rojnamevan, nivîskar, wergêr û siyasetmedarê kurd Edîb Karahan di 15ê Gulana 1976an de ji dinyaya gewrik ji nişka ve bar kiribû û neteweya kurd xistibû nav xemgîniyê. [Bixwîne]

STENBOL (mha/afp/amude.com) - Di nameyeke vekirî de, parlamentera berê ya DEPê Leyla Zana êrîşî berpirsa karûbarên mafên mirovan a hikumeta Elmanyayê Claudia Roth dike. Zana ji Roth dixwaze, ku bila ew "xwe mîna mezinan pêşkêş ke û dev ji "şo" (show) û xwepêşkêşkirina vala berde." Herweha Zana "bazarvaniya" di navbera Roth û serokwezîrê Tirkiyeyê Recep Erdogan de protesto dike. Di çapemeniya tirkî de hate ragihandin, ku Roth ji Erdogan re eşkere kiriye, ku Elmanyayê dê çekan bide Tirkiyeyê, ger ew Zana ji zindanê derxîne. Claudia Roth ji bo çend rojan serdana Tirkiyeyê û bakurê Kurdistanê kir û doza serbestberdana Zana û herweha misogerkirina mafên mirovan li Tirkiyeyê kir. [Bixwîne]

STENBOL (amude.com) - Li Stenbolê û ji nav weşanên Pêrî, romana nivîskarê kurd Abbas Abbas a bi navê "Xewnên Şiyarî" derket. Ev roman ji 111 rûpelan pêk tê. Abbas Abbas li gundê Nissran nêzîkî Qamişloyê ji dayik bûye. Berî niha pirtûkek wî ya din a bi navê "Şevên zivistanî û Melekî Tawus" derketiye. Abbas li bajarê Aachen li Elmanyayê dijî. >> [ABBAS663@aol.com]

AACHEN (amude.com) - Parêzer û çalakvana kurd Eren Keskîn (45) dê xelata îsal a Aachenê ya aştiyê (Aachener Friedenspreis 2004) werbigire. Keskîn dê vê xelatê ji bo xebata xwe ya bo mafên mirovan û ya li dijî êrîşên li dijî jinan li Tirkiyeyê bistîne. Xelata Aachen a aştiyê ji sala 1988an ve ji bo çalakvanên xebata bo aştiyê tê dayin. Ev xelat dê di 01.09.2004an de li bajarê Aachen li Elmanyayê bête dayin. Parêzer Eren Keskîn vê dawiyê xwestibû, ku navê xwe bike "Xezal", lê ev xwesteka wê ji aliyê dadgeha dewletê ve nehate pejirandin. >> [www.aachener-friedenspreis.de]

STOCKHOLM (amude.com) - Roja yekşema 15ê vê mehê, programeke nû bi navê "Dengvedana Peyvê" dê di Roj tv de dest bi weşanê bike. Program ji aliyê helbestvan Ehmedê Huseynî ve tê pêşkêşkirin. Vê hefteyê, helbestvan Hendrên dê bibe mêvanê programê. Herweha kurtejiyana rewşenbîrê kurd Nuredîn Zaza dê bête pêşkêşkirin. "Dengvedana Peyvê" dê demijimêr 22.20 dest pê bike.

UPPSALA (amude.com) - Roja 30ê vê mehê, li bajarê Uppsala li Swêdê dê konsêrteke hunermendan Şivan Perwer û Fatê li dar keve. Konsêrt dê li Idrottsgatatn 2, Fyrishov (Simhall), pêk were û ji 19:30 ta 01:00 bidome. Hêjayî gotinê ye, ku ev ne konsêrteke piştgiriyê ye wek ku Malpera Amûdê pêşî ragihandibû.

OSLO (amude.com) - Ji bo bibîranîna şehîdên 12ê Adarê û piştgiriya başûrê-rojavayî Kurdistanê, kurdên Nerwicê dê roja şemiya 15ê vê mehê li Oslo şevê li dar xînin. Hunermendu Selah Osê û Nebez Mukrîyanî dê beşdarî vê çalakiyê bibin. Şev dê li Oslo, Mysen skol (dibistana Mysen), ABC Veien-Mysen, li dar keve û demjimêr 17:00 dest pê bike.

ATÎNA (amude.com) - Yekşema borî, li paytexta Yunanistanê Atîna konsêrteke ji bo piştgiriya başûrê-rojavayî Kurdistanê li dar ket. Hunermend Şivan Perwer yek ji hunermendên beşdar bû. Di daxuyaniyekê de, ku ji Malpera Amûdê re hate şandin, amadekarên wê çalakiyê, ku ji 8 partiyên kurdistanî û Yekîtiya Xwendevanên Kurd li Yunanistanê pêk tên, radigihînin, ku Şivan Perwer bû armanca êrîşên ji aliyê "hevalbendên PKKê" ve. Li gorî vê daxuyaniyê, "hevalbendên PKKê" kevir avêtin Perwer û beşdarên konsêrtê. Herweha hatiye nivîsandin, ku "hevalbendên PKK" ji kurdan xwestibû, ku beşdarî konsêrtê nebin. Amadekarên konsêrtê wan êrîşan tawanbar dikin û wê weke "êrîşeke li dijî tevgera rizgarîxwaz a gelê kurd" dibînin.

DORTMUND (amude.com) - Di 15ê Gulana 1976an de, xwedî û berpirsiyarê rojnameya Dîcle-Firatê Edîb Karahan çû ser dilovaniya xwe.
Edîb Karahan rojnamevan, nivîskar, wergêr û siyasetvan bû. Ew ji nişka ve ji dinyaya gewrik bar kir û neteweya kurd xiste nav xemgîniyê.
Ji bo bibîranîna Edîb Karahanî, Malpera Amûdê çend nivîsên derbarî wî diweşîne. Ev nivîs ji aliyê nivîskar Mistefa Aydogan ve hatine amadekirin. [Bixwîne]

DORTMUND (ÊVAR BAŞ) - Nivîskarê kurd Evdile bûye mêvanê Malpera Amûdê. Di hevpeyvînekê de li gel ÊVAR BAŞ, Koçer li ser rewşa bakurê Kurdistanê û xebata xwe diaxive. Herweha ew eşkere dike, ku keç jî nivîsên wî dixwînin û ew pir rehet dibe, dema keç bi kurdî xeberan jê re didin. Koçer kurdan û bikaranîna wan a înternêtê rexne dike û dibêje, ku gelek kes "di malperan de vedirşin". [Bixwîne]

STOCKHOLM (amude.com) - Di 15ê vê mehê de, li bajarê Växjö li Swêdê dê festîvaleke helbestê li dar keve. Helbestvanê kurd Ehmedê Huseynî dê li gel çar helbestvanên navdar ên Swêdê (Inger Edelfeldt, Stig Larsson, Bob Hansson û Staffan Hellstrand) beşdarî vê festîvalê bibe. Huseynî dê helbestên xwe bi kurdî bixwîne û piştre helbestên wî dê ji alî xwendevneke taybetî ya helbestê bi swêdî bêne xwendin. Berî xwendinê, Huseynî dê li ser rewşa ziman û helbesta kurdî biaxive. Helbestvan Ehmedê Huseynî dê helbestên xwe di navbera demjimêr 13e û 15an de bixwîne. [Agahiyên bi swêdî]

DORTMUND (amude.com) - Berî çend rojan, mêrek emerîkî li Iraqê ji aliyê hin terorîstên islamî ve hate serjêkirin. Terorîstan filmê vê cerîmeyê di internêtê de belav kir. Armaca wan ji vê yekê ew e, ku emerîkiyan û mirovayetiyê ji xwe bitirsînin. Malpera Amûdê vî filmî diweşîne, da ku hovetî û nemirovayetiya dijiminên mirovayetî û sîvîlîzasyonê diyar bike. (NABE KU ZAROKÊN KÊMÎ 18e SALAN LI FILM TEMAŞE KIN!!!) [Li film temaşe ke]

KÖLN (amude.com) - Di rojên 28-30ê vê mehê de, duyemîn "Pêşangeha Pirtûkên Kurdî li Elmanyayê" dê li bajarê Köln pêk were. Dora 26 weşanxaneyên kurdî ji gelek welatan dê di 3ê rojan de pirtûkên xwe ji bo firotinê pêşkêşî xwendevanan kin. Di vê pêşangehê de, weşanxaneyên APEC, DENG û ARAS dê bêne xelatkirin. Pêşangeha pirtûkan ji aliyê KOMKARê ve tê organîzekirin. [Bixwîne]

STOCKHOLM (amude.com) - Di daxuyaniyekê de, "Inîsyatîva 12ê Adarê" ya rewşenbîrên kurd ji rêjîma Suryayê doza serbestberdana nivîskarê kurd Ebdulselam Darî û helbestvanê kurd Mihemed Bengo (Bavê Tosîn) dike. Herweha ew desthilata Suryayê wek "berpirsa kiryarên nemirovane li dijî gelê kurd" destnîşan dike banga hemî sazî û dezgehên mafê mirovan dike, ku "bi lezgînî dest pê bikin û êrîşên rêjîma Suryayê rawestînin û mafê mirovan biparêzin." Malpera Amûdê daxuyaniya "Inîsyatîva 12ê Adarê" diweşîne: [Bixwîne]

WAŞINGTON (reuters/amude.com) - Hin parlamenterên emerîkî ragihandin, ku serokê Dewletên Yekbûyî yên Emerîkayê (DYA) George W. Bush dê di hundirê vê hefteyê de biryara zagonên cezakirina Suryayê bide. DYA Suryayê tawanbarî piştgiriya terorîzma cîhanî dike. Li gorî van zagonan, Suryayê dê di warê aborî de bête cezakirin. Balafirên surî dê nikaribin biçin Emerîkayê û herweha peywendiyên aborî bi hikumeta surî re dê bêne birîn û bazarvaniya di navbera herdu welatan de dê were rawestandin. Ev zagon dikarin sibe ji aliyê serokatiya Emerîkayê ve bêne derxistin.

DÜSSELDORF (ap/amude.com) - Polîsên elman îroj ragihandin, ku wan di 02ê vê mehê de li bajarê Düsseldorf berpirsekî PKKê bi navê Hesen A. (33 salî) girt. Li gorî agahiyên polîsan, siyasetvanê kurd ji sala 2001ê ve berpirsê çalakiyên PKKê yên di herêmên Dortmund, Essen und Duisburg de bû. Di hezêrana sala borî de, ew bi berpirsyariya herêma Bakur rabû. Hasan A. ji ber "endametî û berpirsyariya di rêxistineke krîmînêl" de hate girtin û dozek li dijî wî hate vekirin. PKKê û herweha Kongra Gel li Elmanyayê qedexe ne û endametiya di van rêxistinan de jî qedexe ye.

WAŞINGTON (amude.com) - Ji bo piştgiriya kurdên başûrê-rojavayî Kurdistanê, kurdên li bakurê Emerîkayê dê çend konsêrtan ji bo hunermendan Ciwan Haco û Xêro Ebas li dar xînin. Ev konsêrt aji aliyê Şêrkoh Ebbas ve têne organîzekirin. Malpera Amûdê programa konsertên piştgiriyê diweşîne: [Bixwîne]

ROSTOCK (oz/amude.com) - Li bajarê Rostock li Elmanyayê, do 7 kurdên bakurê Kurdistanê ji mirinê filitîn. Qaçaxçiyê wan ew di kamyonekê de veşartibûn. Berî ku kamyon bikeve gemiyekê ji bo çûna Swêdê, şufêrê kamyonê deng ji hundirê kamyonê bihîstin û polîs agahdar kir. Polîsan dît, ku 7 mêr di kamyonê de veşartî ne. Rewşa wan pir dijwar bû û tenê bi alîkariyê karîbûn ji kamyonê dakevin. Eger ew nehatibana rizgarkirin, ew dê di gemiyê de miribana. [Bixwîne]

DORTMUND (amude.com) - Jin û mêr ne wek hev in. Tenê eger ew evîndar bin, nêzîkî hevdu dibin û mêr jintir dibin û jin mêrtir. Zanyara îtalî Donatella Marazzîtî û hevakarên wê li Zanîngeha Pîsa di lêkolînên xwe de eşkere kir, ku li cem mêrên evîndar hormonên cinsî testosteron bi şêweyekî mezin dadikevin, lê li cem hevalên wan ên jin bilind dibin. [Bixwîne]

Ehmed Dag

BERLÎN (amude.com) - Parlamana xwendekarên Zanîngeha Berlînê ya Azad bi yekdengî avêtina xwendekarên kurd ji zanîngehên Suryayê şermezar û protesto kir û ji hikumeta Elmanyayê doza xebata li dijî êrîşên li dijî xwendekarên kurd li Suryayê kir. Herweha parlamanê piştgiriya xwe ji bo hevkarên xwe yên kurd eşkere kir. Xwendekar û çalakvanê kurd Ehmed Dag bi vê inîsyatîvê rabûbû û grûpên di parlamanê de agahdarî rewşa xwendekarên kurd kiribû. [Bixwîne]

BERLÎN (amude.com) - Ji 14e ta 16ê vê mehê, li paytexta Elmanyayê Berlîn dê yekemîn "Rojên Kultura Kurdî" li dar kevin. Di van rojan de, dê pêşangeheke pirtûkan pêk were. Herweha dê çend semînarên ji bo nivîskarên kurd li dar kevin û film, şano, wêne, dîlan û stranên kurdî bêne pêşkêşkirin. Ev çalakî ji aliyê komeleya "Kurdistan Kultur- und Hilfsverein e.V" ve têne amadekirin. [Bixwîne]

DORTMUND (amude.com) - Kanala televizyonê ya kurdî "Roj Tv" dest bi weşana zindî ya di internêtê de kir. Ji niha û pê ve, mirov dê bikaribe di rêya malpera www.roj.tv re bi şêweyekî zindî li programên Roj Tv temaşe bike. Herweha mirov dikare di rûpela pêşî ya Malpera Amûdê de qi quncika "tv & radyo" de li Roj Tv û kanalên din ên kurdî temaşe bike û li hin radyoyên kurdî guhdar bike.

HANNOVER (dpa/amude.com) - Şagirtek elman ê 18e salî îroj li bajarê Rotenburg li Elmanyayê ji bo programkirina vîrusa "Sasser" û belavkirina wî di internêtê de hate girtin. Vîrusa "Sasser" berî çend rojan di rêya internêtê re kete bi milyonan ji computeran û bû sedema serêşeke mezin ji bikarhênerên normal û herweha fîmeyên mezin li cîhanê re. [Wilo "Sasser" ji computeran tê avêtin]

BRÛKSEL (dîha/amude.com) - Yekîtiya Rojnamegerên Ereb da xuyakirin, ku ew naxwaze ku Sendîqaya Rojnamegerên Kurdîstanê beşdarî Kongreya Federasyona Rojnamegerên Cîhanê bibe. Yekîtiyê ewlekariya Iraqê wekî sedema vê yekê nîşan da. Sendîqaya Rojnamegerên Kurdîstanê bangî rojnamegerên ereb kir, ku nebe berdevka welatên ereb û bitenê guhê xwe bide xebata xwe ya di warê rojnamegeriyê de. [Bixwîne]

Mîkaêl Ibrahîm - DORTMUND (ÊVAR BAŞ) - Dilê min bi te re ye, Qamişloyê.. û bi xuşkên te Amûdê, Serê Kaniyê, Efrîn û.. re. Li beramber giyanên berz ên goriyên zikreşiya şovînî ya nemirovane, giyanê min bi we re sirûda "ey Reqîb" dibêje.. Şehîdên me yên pîroz, ên ku di van rojan de li wê derê ketin, wek ku hûn li beramber şehîdên xwe yên li Helepçeyê amade bûn.. [Bixwîne]

HANNOVER (amude.com) - Roja şemiya 8ê vê mehê, kurdên bajarê Hannover li Elmanyayê dê çalakiyekê ji bo bibîranîna şehîdên serhildana başûrê-rojavayî Kurdistanê li dar xînin. Ev çalakî dê li qada Opernhaus, Georgstr., li dar keve û ji demjimêr 17e ta demjimêr 20.00 berdewam ke.

Baran Hemze - BONN (amude.com) - Bersiva vî tiştê giring ne gelek hesan e. Divê gelek tişt bêne nirxandin û mirov ji kêmasiyên rexistinên xwe nereve! Heger di vî warî de hêzên kurdistanî li xwe "mikur" wrein, wê karê me gelek hesanîtir bibe.
Çi ye li xwe "mikur" hatin?
1. Qebulkirina têkçûna xwe
2. Zelalkirina sedemên têkçûnê. [Bixwîne]

ATÎNA (amude.com) - Ji bo piştgiriya kurdên başûrê-rojavayî Kurdistanê û protestokirina êrîşên li dijî wan ji aliyê rêjîma Suryayê ve, hêzên sîyasî û neteweyî li Yunanistanê dê bi beşdarbûna hunermendan Şivan Perwer û Evîna Welat roja 9ê vê mehê konsêrtekê li bajarê Atîna pêk werînin. Konsêrt dê li şanoya "Teatro Petras" li devera Petrûpolis, demjimêr 6.30ê êvarî, li dar keve.

Bayram Ayaz - KÖLN (amude.com) - Ev nêzîkî mehek û nîv e, kevnebaasiyên hêla bajarê Felluce êrîşên xwe li hemberî emerîkiyan zêde kirin.
Bêguman ev terorîstên Felluceyê ne tenê kevnebaasî ne, cure cure fanatîk û xwefiroş jî di nav van hovan da henin. Herêma navçeyê Iraqê bûye wekî cihê mezada insanên xwefiroş. Gelek rêxistinên olî-fanatîk û hin servîsên nehênî, yên ku bi destê dewletên dorber hatine damezirandin, li vê sêqoziya hêla Felluce û her wisa li Mosulê û li Kerkûkê li ser karê xwe ne û gelek çalak in. [Bixwîne]

Lîlav Baker

OSLO (ÊVAR BAŞ) - Lîlav Baker keçeke 11e salî ji başûrê-rojavayî Kurdistanê ye û li bajerê Oslo li Nerwicê dijî. Ew li dibistanê fêrî nivîsandina zimanê kurdî bûye. Lîlav du helbest bi zimanê kurdî nivîsandine. ÊVAR BAŞ herdu helbestên wê yên bi navên "Zimanê kurdî" û "Bijî Kurdistan" diweşîne. [Bixwîne]

Evdile Koçer

Evdile Koçer - SÊRT (ÊVAR BAŞ) - Em tê de simbêlê rastiya xwe badidin; emrê me bi rastiya me re spî bû, lê em hê jî berçem berçem têk diçin...
Melayê xwedêjêrazî, xutbeya têkçûna me dixwîne, lê guhê me ne lê ye! Hewlo hawar, ka carekê dêna xwe bidinê, heyran; hema belkî di vê têkçûnê de jî xêrek hebe, heyran... [Bixwîne]

DORTMUND (amude.com) - "Hêka Jiyanê" projeyeke hevbeş a hunermend Cemal Ebdo (Mîrê Hêkan) û Malpera Amûdê ye. Ev pêşangeh dê salekê dirêj bike. Her heftî, dê tabloyeke "Mîrê Hêkan" bi şêweyekî berfireh bête pêşkêşkirin. Ji her tabloyekê dê hejmareke mezin ji wêneyan ji gelek aliyan ve bêne pêşkêşkirin. Pêşangeh îroj dest pê kir û dê ta 05.05.2005an bidome. Navê tabloya hefteya yekemîn "Mykonos" e û ew kuştina siysaetvanên kurd ên PDK-Îran di 17.09.1992an de li xwaringeha Mykonos li Berlînê ji aliyê terorîstên rêjîma Îranê ve diyar dike. [Derbasî pêşangehê bibe]

HAMBURG (amude.com) - Platforma kurdên Hamburgê dê vê şemiya 8ê mehê semînarekê li ser rewşa başûrê-rojavayî Kurdistanê li dar xînin. Rojnamevan Sîrwanê Hecî Berko dê li gel siyasetvanan Dr. Ehmed Reşîd û Mistefa Dîlan li ser bûyerên dawî yên li Binxetê biaxivin. [Bixwîne]

DORTMUND (amude.com) - Di van rojên dawî de, vîrusek bi navê "Sasser" di rêya internêtê re derbasî computeran dibe û dihêle ew computer bêne vemirandin. Vîrus tenê dikeve wan computeran, ên ku sîstemên Windows XP û Windows 2000 bi kar tînin û "firewall" (dîwarê agir) di wan de tuneye. Malpera Amûdê rêyên avêtina vî vîrusî ji computeran diweşîne: [Bixwîne]

DORTMUND (amude.com) - Di bangekê de ji bo rewşenbîr, dahêner û şêwekarên kurd ên li derveyî welêt, "12ê Adarê, Inîsyatîva Rewşenbîrên Kurd (Sûrî)" banga tevlêbûna inîsyatîvê dike. Ew radigihîne, ku ew ê "hewl bide ku hêzên rewşenbîran yeklaş û yekdeng" bike û di van çend mehan de "kongreyekê ji boyî hemî çalakvanên peyv û hunerê" li dar bixîne. Armanca vê inîsyatîvê ew e, ku rêxistineke rewşenbîran saz bike. Malpera Amûdê banga inîsyatîvê diweşîne: [Bixwîne]

Beşar el-Esed

DORTMUND (amude.com) - Serokê Suryayê Beşar el-Esed ragihand, ku kurd beşek bingehîn ji dîroka Suryayê ne. Di hevpeyvînekê de li gel kanala televizyonê ya erebî "el-Cezîrê", el-Esed eşkere kir, ku piştrast bûye, ku rola ti hêzên biyanî li pişt bûyerên dawî yên li başûrê-rojavayî Kurdistanê tune bû. Rêjîma Suryayê tim digot, ku "destine biyanî li pişt wan bûyeran in." Herweha el-Esed got, ku hikumeta Suryayê ji mêj ve li ser problêma kurdên bê nasnameya surî radwisetin û ew dê wê nêzîk çareser bikin. Ev yekemîn car e, ku serokekî surî li hebûna kurdan û rola wan a li Suryayê mikur tê. Destura Suryayê tenê neteweya erebî dipejirîne. Di hevpeyvîneke xwe ya dawî de bi rojnameya emerîkî "New York Times" re, el-Esed ragihandibû, ku ew kurdan nas nake. Helwesta rêjîma Suryayê piştî serhildana kurdan bi şêweyekî berbiçav hate guhertin. Lê ti encam ji guhertina vê helwestê eşkere nebûne. Hîn jî bi hezaran kurd di girtîgehan de têne işkencekirin û bi dehan hatine kuştin.

BOCHUM (amude.com) - Berî du demjimêran, li bajarê Bochum li Elmanyayê şeveke muzîkê ji bo piştgiriya başûrê-rojavayî Kurdistanê bi dawî hat. Ev çalakî bi alîkariya hunermendan Bangîn, Ebas Ehmed, Mehmud Ezîz Şakir, Şêro Betê, Emîn Sebrî, Luqman Cemîl û Dilovan û bi beşdarbûna 400 kesan li salona "Lorîn" pêk hat. Di vê şevê de, hin ji dîmenên serhildana başûrê-rojavayî Kurdistanê hatin pêşkêşkirin û herweha çend helbest hatin xwendin. Li gel ku navê dengbêj Xêro Ebas di nav programa şevê de bû, lê ew ji ber sedemine nediyar beşdar nebû. Ev yek bû sedema acizbûn û herweha rexneyên ji aliyê hunermend û beşdaran ve. Ev şev ji aliyê Rêber Ferho ve hate amadekirin.

Ibrahîm S. Aydogan

PARÎS (ÊVAR BAŞ) - Di beşê duyem û dawî yê nivîsara xwe "Heyama nû, an jî dema kesên ku êgir bera bênderan didin, an jî serê têgihiştineke edebî ya nû" de, nivîskar Ibrahîm Seydo Aydogan bi berfirehî li ser pirtûka helbestan a helbestvan Rênas Jiyan a bi navê "Mexzena Xwînê" radwiste û tê de eşkere dike, ku pêdiviya wêjeya kurdî bi "heyameke nû" ya xwenûkirinê heye. [Bixwîne]

DORTMUND (amude.com) - Di rojên 23, 24 û 25ê meha borî de, komek rewşenbîrên kurd ji nivîskar, helbestvan, rojnamevan, şêwekar û şanogeran ên ji başûrê-rojavayî Kurdistanê li bajarê Sandvîkin li Swêdê komcivînek pêk anîn û dest bi inîsyatîvekê ji bo sazkirina rêxistineke rewşenbîrî kir. Navê inîsyatîvê "12 Adarê - Inîsyatîva Rewşenbîrên Kurd (Sûrî)" ye. Di vê komcivînê de, komîteyek ji 7 kesan hate hilbijartin. Ev komîte dê di 6 mehên bê de kongreya sazkirina rêxistina rewşenbîran amade bike û têkiliyan bi rewşenbîran li seranserî cîhanê pêk werîne. Malpera Amûdê daxuyaniya inîsyatîvê diweşîne: [Bixwîne]