13.03.2003 - 21:25
XEWNFIROŞ
Nûbar Hesen
Îsal weke her sal
Hat û tûr li milê wî
Lê îsal ne wek her sal
Diyariyên zarokan anîbûn
Tenê hinek kul û xem
Û barek hêsir
û çend xewnên pînekirî
di biniya tûrê wî de bûn
* * *
Îsal berf nehat
û tû nehatî
û evîn nehat
tenê xewnfiroş
rahişte birînên xwe
û di kolanên şevê de
çû û hat
* * *
ser salek e sar e
ne roj der ket
û ne germiya lêvên te
da dilê xewnfiroş!
Û bîna birînek e
pîîîîîîîîîîr
ji kincên wî tê
û çend xewnên birîndar
di nav qermûçkên
riwê wî de
xwe veşartibûn
* * *
ser salek e tarî ye
û roniya dêmên te der nehat
û evîna xewnfiroş
weke binefşek e
pûûûûûûç...........herifî
û dilê wî mîna kulîlkek e piçûk
bi baranê kêfxweş bû
û di kêfa xwe de.....mir!
|
|
|
